पोखरा / शुक्रबार प्रधानमन्त्री बालेन शाह मुस्ताङ जाने भनी हिडे । हवाई मार्ग वा सडक मार्ग भन्ने यकिन थिएन । प्रधानमन्त्री शाह परिवारसहित स्थलमार्ग हुँदै कास्कीको माछापुच्छ्रे गाउँपालिका-६ अस्ताम आए । अस्तामस्थित अन्नपूर्ण इको भिलेजमा बस्ने उनको योजना रह्यो । सोही अनुसार नेपाली सेनाले सुरक्षा व्यवस्था पनि मिलायो ।
पोखरा हुँदै सोझै मुस्ताङ जाने वा बिचमा बस्ने भन्ने थियो । तर पौने ३ बजे प्रधानमन्त्री अस्ताम आइपुगे । स्थानियले प्रधानमन्त्री आएको सुइको पाए तर देख्न सम्म पनि पाएनन् । कालो सिसाको गाडिमा इको भिलेज गएपछी करिब ३०० मिटरको राडर सेनाकै सुरक्षामा रह्यो । स्थानीयले भेट्न खोज्दा नमिल्ने बताए ।
पारिवारिक भ्रमण भएको भन्दै सरकारी संयन्त्रलाई पनि खबर नभएको प्रमुख जिल्ला अधिकारीदेखि प्रहरी संयन्त्रले जनायो। ‘प्रधानमन्त्री आउने भन्ने थाहा थिएन । आएपछी थाहा भयो ,’ स्थानीय शोभाखर अधिकारीले भने, ‘अब जनताले नै रुचाएका व्यक्ति हुन भेट्छन होला भन्ने लागेको त्यसो भएन ।’
आफ्नै आँगनको बाटो हुँदै रिसोर्टतिर लागेका बालेन्द्रको गाडी उनीहरुले टाढै बसेर हेरेका हुन् । प्रधानमन्त्री आफ्नो गाउँ आइपुगेपछि उनीहरू खुसी छन् । तर, भेट्न चाहेका स्थानीयलाई भेट्न नपाइने चिन्ता पनि छ ।
‘प्रधानमन्त्री ज्यूसँग भेट्न असाध्यै चाहना छ । भेटेर कुरा राख्न पाए धेरै राम्रो हुन्थ्यो । भेट्न मिलाइदिने को हो चाहिन् थाहा छैन,’ शोभाखरले थपिन् । त्यहाको एउटै समस्या हो खानेपानीको । प्रधानमन्त्री बालेन्द्र शाहसँग भेटेर खानेपानी मिलाइदिन माग गर्ने सोच उनिहरुको छ ।
स्थानीय नन्दलाल अधिकारी खानेपानी अभावले गाउँलेलाई सास्ती भएको बताउँछन् । ‘हाम्रोमा मुख्य समस्या खानेपानीको हो । हामीले भेट्न पायौँ भने खानेपानीबारे कुरा राख्न मन थियो,’ उनले भने, ‘तर, भेट्न मेसो मिलाउन मुस्किल देखिएको छ ।’ स्थानीय रामप्रसाद अधिकारी पनि खानेपानीको चरम अभाव रहेकोले यसको व्यवस्थाका लागि प्रधानमन्त्रीसँग आग्रह गर्छन् ।
‘बर्खाको समयमा त पानी ठिकै पाइन्छ । हिउँदमा पानी पुग्दैन गाह्रो छ,’ उनले भने, ‘प्रधानमन्त्रीले हेर्दिए हुन्थ्यो भन्ने अपेक्षा छ ।’ अस्ताममा धम्पुसबाट पानी ल्याइएको छ । माथिल्लो अस्ताममा उचाइका कारण पानी पर्याप्त पुगेको छैन । ‘प्रधानमन्त्री अहिलेसम्म कोही आउनुभएको थिएन,’ स्थानीयहरू भन्छन्, ‘यही अवसरमा उहाँसँग भेट्न पाए झन् सुनमा सुगन्ध हुने थियो ।’
निजी भ्रमण भएकोले सर्वसाधारणसँग भेट्ने सम्भावना निकै कम छ । यद्यपि, स्थानीयले आफ्ना गाउँका समस्या सुनाउने अवसर मिलाइदिन आग्रह गरेका छन्। ‘भ्रमणमा अस्ताम रोज्नुभएकोमा उहाँलाई धेरै धन्यवाद छ । यो बेला गाउँका समस्या पनि बुझेर जानुभयो भने राम्रो हुन्छ,’ गाउँलेहरू भन्छन्, ‘फर्केपछि यो गाउँका लागि केही गरिदिनुहुन्छ कि भन्ने आशा गरेका छौँ ।’
अस्ताम कास्कीको पर्यटकीय गाउँ हो । सेनाको व्यारेक बाहेक कहि रोकिएनन बालेन यश अघिका प्रधानमन्त्रीहरु भ्रमण गर्दा जिल्ला प्रशासनले सुरक्षा व्यवस्था मिलाउने काम गर्थ्यो । तर बालेन आउँदा भने काठमाडौ देखि अस्ताम आउदासम्म उनले सेनाको व्यारेक बाहेक कहि रोकेन्न । नेपाली सेनाले उनको सुरक्षा प्रबन्ध मिलाइरहेको छ ।
शनिबार बिहानै मुस्ताङ भ्रमणका लागि निस्किने सुरक्षा संयन्त्रले जनाएको छ । विहान धादिङको व्यारेकमा ब्रेकफास्ट गर्न छिरेपछी प्रधानमन्त्री शाह १ बजेर ४० मिनेटमा तनहुँ ब्यास न.पा.-५ चापघाट स्थित श्री कालिभञ्जन गणमा खाना खाएका थिए । त्यसपछी उनी पोखरा आएका हुन ।
प्रधानमन्त्रीका लागि पोखरामै सेनाले हेलिकप्टर समेत तयारी अवस्थामा राखेको छ । तर उनी उनको मुस्ताङको भ्रमण तालिका भने सार्वजनिक भैसकेको छैन । ‘उहाँको भ्रमणबारे समाचारमा जे आएको छ त्यही मात्र हो । तालिका अहिलेसम्म पाएका छैनौँ,’ मुस्ताङकी सिडिओ अजिता शर्माले भनिन्, ‘हामी बुझ्दैछौँ ।’
कास्कीका पनि सुरक्षा संयन्त्रलाई उनको भ्रमणको औपचारिक जानकारी दिइएको छैन। उनको बासस्थानमा जिल्लाका कुनै पनि सुरक्षा निकाय सहभागी छैन । उनको सुरक्षाका लागि सबै संयन्त्र काठमाडौँबाटै खटिएको छ ।
