पोखरा / पोखराको मेयर हर्क चोकमा सडकको नालीमा आएको पानीको भेलले बगाएर गम्भिर घाइते भएका आमा र छोरीको उपचारको क्रममा ज्यान गएको छ ।
२६ वर्षकी सुष्मा दाहाल र उनकी २ वर्षकी छोरी रानीका दाहालको मृत्यु भएको हो । शुक्रबार दिउँसो बिरौटाबाट पृथ्वीचोक तर्फ आउँदै गरेको ग १३ प २८५९ नम्बरको स्कुटरबाट ओर्लने क्रममा उनीहरुलाई भेलले बगाएको थियो ।
स्कुटर सुष्माका श्रीमान ३० वर्षका कमल दाहालले चलाएका थिए । अत्याधिक वर्षा भएपछि कमलले बाटोमा स्कुटर साइड लगाएर झर्न खोज्दा सडक किनारको नालीमा बगिरहेको तीव्र भेलले पहिला छोरीलाई बगाएको थियो । छोरीलाई समाउने क्रममा आमा सुष्मालाई समेत नालीले बगाएको थियो ।
घटनाबारे थाहा पाएलगत्तै डिएसपी सूर्यबहादुर बोगटीको कमाण्डमा २१ जनाको प्रहरी टोली घटनास्थल पुगेको थियो । प्रहरी र स्थानीयको सक्रियतामा उनीहरुलाई दिउँसो ४ बजेर २३ मिनेट जाँदा बिरौटास्थित फेवा नहरको कुलोबाट उद्धार गरिएको थियो ।
उद्धारपछि दुवै जनालाई तत्काल उपचारका लागि गण्डकी मेडिकल कलेज पठाइएकोम उपचारका क्रममा सुष्माको शुक्रबार राति ९ बजेर ४० मिनेटमा र छोरी रानीकाको शनिबार बिहान १ बजेर २१ मिनेटमा ज्यान गएको अस्पतालले जानकारी दिएको छ ।
दुवैको शव अहिले सोही अस्पतालमा राखिएको छ ।
