बागलुङ / बागलुङ कालिका भगवती गुठी व्यवस्थापन समितिले भोटेकोशी नदीमा आएको बाढीबाट प्रभावित नागरिकहरूको राहत तथा पुनःस्थापनाका लागि पहिले घोषणा गरेको रकममा थप गरेर अर्थमन्त्रीलाई बुझाएको छ । संघिय सांसद सुशिल खड्काको रोहवरमा समितिका अध्यक्ष राम बहादुर खड्काले अर्थमन्त्री स्वर्णिम वाग्लेलाई ११ लाख ११ हजार १ सय ११ रुपैयाँ आर्थिक सहयोग गरेको सचिव निशान खड्काले बताए।
गुठी व्यवस्थापन समितिले सुरुमा ५ लाख सहयोग गर्ने घोषणा गरेको भएपनि सो रकममा थप गरेर सिंहदरबारस्थित मन्त्रालयमा अर्थमन्त्री डा. स्वर्णिम वाग्लेलाई शुक्रवार भेटेर सो रकम बराबरको चेक हस्तान्तरण गरेको हो ।
चेक ग्रहण गर्दै अर्थमन्त्री डा. वाग्लेले संकटको घडीमा बागलुङ कालिका गुठीले देखाएको मानवीय संवेदनशीलता र सहयोगको सराहना गरे । उक्त रकम बाढी पीडितको आवश्यकताका आधारमा पारदर्शी ढङ्गले राहत र पुनरुत्थानमा उपयोग गरिने अर्थमन्त्री वाग्लेको भनाई थियो ।
धार्मिक तथा सामाजिक कार्यमा सक्रिय रहँदै आएको बागलुङ कालिका भगवती गुठीले यसअघि पनि विभिन्न दैवी प्रकोप र संकटका समयमा संस्थागत सामाजिक उत्तरदायित्व अन्तर्गत सहयोग गर्दै आएको समितिका अध्यक्ष खड्काले बताए । खड्का हालैमात्र अध्यक्षमा मनोनित भएका हुन् ।
