कुश्मा, १३ चैत – कोरोना संक्रमण पुष्टि भएकी युवतीसंगै एउटै बिमानमा आएका बागलुङ्गका एक युवालाइ पर्वत अस्पतालको आइसोलेसन वार्डमा भर्ना गरिएको छ । कतार एयरवेजको ‘क्यूआर ६५२’ बाट संक्रमित युवतीसंगै आएका युवालाई बिहीबार साँझ पर्वतको कुस्माबजार स्थित कोरोना अस्थाई अस्पतालको आइसोलेसनमा भर्ना गरिएको हो ।
बागलुङ्ग जिल्लामा घर भएपनि कुस्माबजारमा आफन्तको घरमा होम क्वारेन्टाईनमा बसेका ती युवालाई परिक्षणका लागि आइसोलेसनमा राखिएको पर्वत अस्पतालका निमिक्त सुपरिटेण्डेन्ट डा. शिशीर देबकोटाले जानकारी दिए । ‘युवती संगै एउटै बिमानमा आएका कारण परिक्षणका लागि आइसोलेसनमा राखिएको हो’ डा. देबकोटाले भने, ‘अहिले ती युवाको अबस्था सामान्य छ ।’ उनमा कोरोना संक्रमणका लक्षण भने देखिएको छैनन । कोरोनाको संक्रमणका लक्षणहरु देखिएको अबस्थामा मात्रै स्वाब परिक्षणका लागि पठाइने डा. देबकोटाले जानकारी दिए ।