बागलुङ, ७ जेठ– बागलुङको बरेङ गाउँपालिकाले कोरोना कहरका बीच अग्रपंक्तिमा रहेर काम गरिरहेका स्वास्थ्यकर्मी, सुरक्षाकर्मी र पत्रकारहरुको लागि कोरोना बीमा कार्यक्रम संचालनमा ल्याएको छ । गाउँपालिकाले कोरोना संकटको समयमा अग्रपंतिमा रहेर काम गर्ने स्वास्थ्यकर्मी, सुरक्षाकर्मी, कर्मचारी र पत्रकारहरुको आत्मबल बढाउनको लागि गाउँपालिकाले १ लाख बराबरको कोरोना बीमा कार्यक्रम संचालनमा ल्याएको गाउँपालिकाका अध्यक्ष कृष्ण प्रसाद शर्माले जानकारी दिए । कोरोनाको महामारीमा जोखिम मोलेर बिरामीको उपचारमा खटिने स्वास्थ्यकर्मी र राष्ट्रसेवक कर्मचारीहरुलाई कामप्रति उत्तरदायि बनाउन बिमा कार्यक्रमको सुरुवात गरिएको अध्यक्ष शर्माले बताए ।
