पोखरा/ योङ कम्युनिष्ट लिग (वाइसीएल) नेपालका केन्द्रीय संयोजक सुमन देवकोटाले फेवाताल मिच्नेहरुलाई नछाड्ने चेतावनी दिएका छन् । पोखरामा शनिबार पत्रकार भेटघाटमा बोल्दै देवकोटाले ताल मिचेर खानेहरुलाई सडकमा ल्याउने बताए ।
‘फेवाताल मिचेर खानेहरु चैनको निन्द्रा सुत्न पाउँदैन’, देवकोटाले भने,‘वाइसिएलले प्राकृतिक सम्पदा हडप्ने, मिच्ने र कब्जा गर्ने अपराधीहरुलाई सडकमा ल्याउँछ ।’ फेवाताल मात्र नभएर प्राकृतिक सम्पदा दोहान गर्ने सबैखालका अपराधीलाई नछाड्ने उनले बताए । भ्रटाचार, अनियमितता र सामाजिक अपराध गर्नेका विरुद्ध वाइसिएलले आन्दोलन गर्नेसमेत उनले बताए ।
स्थानीय तहमा भ्रष्टाचार मौलाएको भन्दै देवकोटाले भ्रष्टाचारीको खोजी गरेर सार्वजनिक गर्ने समेत चेतावनी दिए । महालेखा परिक्षकको प्रतिवेदनले भ्रष्टाचार उजागर गरेको भन्दै उनले यसको छानविन गर्न सरकारलाई ज्ञापन पत्र बुझाएको स्मरण गरे ।
वाइसिएलले सबै निर्वाचन क्षेत्रमा स्वयंसेवक दस्ता र वडा तहमा स्पेशल टास्क फोर्स गठन गर्न लागेको समेत देवकोटोले बताए । यसले भ्रष्टाचार विरुद्ध अभियान चलाउने, युवालाई उत्पादनसँग जोडने र संगठन विस्तामा टेवा पु¥याउने उनको भनाई छ । प्रेस संगठन कास्कीका अध्यक्ष सन्देश श्रेष्ठको अध्यक्षतामा भएको कार्यक्रमको संचालन घनश्याम पाण्डेयले गरेका थिए ।
