पोखरा,९ साउन–नेपालले साफ यू २० च्याम्पियनसिपमा माल्दिभ्समाथि ४–० गोलको सानदार जित निकालेको छ ।
भारतको भुवनेश्वर कालिंका रंगशालामा आजदेखि सुरु भएको च्याम्पियनसिपको पहिलो खेलमा नेपालले सुखद् सुरुवात गरेको हो ।
नेपालका लागि दीपेश गुरुङ, सुगम सुवाल, ऋतिशरत्न छुन्जु, मनग्य नकर्मीले गोल गरे । दीपेशले खेलको ४२ औं मिनेटमा रिबाउन्ड आएको बललाई झण्डै २५ यार्डबाट गोल गरे ।
कप्तान आयुष घलानको फ्रिकिक प्रहारमा आएको बललाई माल्दिभ्सका गोलरक्षकले पन्च गर्दा रिवाउन्ड बलमा उनले प्रहार गरे ।
सुगमले ५८ औं मिनेटमा टोलीका लागि दोस्रो गोल गरेका थिए । उनले दोस्रो बारमा गरेको प्रहारले जाली चुमेको हो । ऋतिशले ६२ औं मिनेटमा पेनाल्टीमार्फत गोल गरे ।
कप्तान आयुषलाई माल्दिभ्सका खेलाडीले पेनाल्टी बक्समा फाउल गरेपछि नेपालले पेनाल्टी पाएको थियो ।
परिवर्तित मनग्यले इन्जुरी समयको चौथो मिनेटमा गोल गर्दै टोलीको जितलाई फराकिलो पारेका थिए । उनी ८३ औं मिनेटमा ऋतिशको ठाँउमा मैदानमा प्रवेश गरेका थिए ।
राउन्ड रोविन लिगको आधारमा खेलाइएको खेलमा नेपालले अब बुधबार श्रीलंकासँग खेल्नेछ । साउन १५ गते आयोजक भारतसँग र साउन १७ गते बंगलादेशको सामना गर्नेछ ।
