पोखरा/ पोखराको विन्ध्यवासिनी मन्दिरमा रहेको दानपेटिका चोरी भएको छ । यही भदौ ३ गते राति मन्दिर परिसरमा रहेको दानपेटिका चोरी भएको हो । प्रहरीले चोरी गर्ने व्यक्तिलाई पनि पक्राउ गरेको छ । पोखरा २५ तिब्बतीयन क्याम्पमा बस्ने २० वर्षीय दोर्जेले दानपेटिका चोरेका थिए ।
मन्दिर स्रोतका अनुसार उनी दिउसैदेखि मन्दिरमा गएर बसेका थिए । भोलिपल्ट सो क्षेत्रमा तायःमचा प्रतियोगिता आयोजना हुँदै थियो । मन्दिर परिसरमा बसेका दोर्जेले रातमा सुरक्षाकर्मी सुतेपछि दानपेटिका उठाएर हिँडेका थिए । पछि मन्दिरमा रहेको सिसि क्यामेरामा हेर्दा चोरी गर्ने व्यक्तिको पहिचान खुलेको थियो । प्रहरीले सोही आधारमा दोर्जेलाई पक्राउ गरेको हो ।
