पोखरा / यती एयरलाइन्सको विमान दुर्घटनामा पत्रकार त्रिभुवन पौडेलको निधन भएको छ । नेपाल पत्रकार महासंघका केन्द्रीय सदस्यसमेत रहेका पौडेल पोखरामा नेपाल प्रेस सेन्टरको बैठकको तयारीमा थिए । त्यसकै निम्ति उनी बैठकको मिति तय गर्न काठमाडौं पुगेका बताइएको छ ।
माओवादी केन्द्रका अध्यक्षसमेत रहेका प्रधानमन्त्री पुष्पकमल दाहाल प्रचण्डको व्यस्तताका कारण समय नमिलेपछि १-२ दिनमा फेरि काठमाडौं फर्किने गरी पौडेल यती एयरलायन्सको विमानमा पोखरा फर्किएका थिए ।
जहाजमा सवार ७२ जनामध्ये ६९ जनाको मृत्यु भएको पुष्टि भएको छ । जसमध्ये पौडेलको पनि शव सनाखत भएको नेपाल पत्रकार महासंघ कास्कीका अध्यक्ष विमला भण्डारीले जानकारी दिइन् । पत्रकार पौडेलको पाइन्टमा वालेट र उनको परिचयपत्रसमेत भेटिएका आधारमा उनको शव पहिचान भएको हो ।
नेपाल पत्रकार महासंघले पौडेलको निधनमा १३ दिनसम्म केन्द्र, प्रदेश र सबै शाखामा शोक मनाउने निर्णय गरेको छ । १३ दिनसम्म शोकसभा बाहेकका कुनै पनि औपचारिक कार्यक्रम नगर्ने र १३ दिनसम्म केन्द्रीय कार्यालयसहित प्रदेश र शाखा कार्यालयमा शोक पुस्तिका राख्ने निर्णय भएको महासचिव रोशन पुरीले जानकारी दिए ।
