पोखरा / गण्डकी प्रदेशका मुख्यमन्त्री खगराज अधिकारीले प्रधानमन्त्री पुष्पकमल दाहाल प्रचण्डसँग भेटवार्ता गरेका छन् । आज बिहान प्रधानमन्त्री निवास बालुवाटारमा भेटवार्ता भएको हो ।
गण्डकीमा मन्त्रालयको संख्या घटाएर मुख्यमन्त्री अधिकारी मन्त्रालयको भागबण्डाको लागि शिर्ष नेताको सल्लाह लिन सोमवार राजधानी गएका थिए । भेटवार्तामा प्रदेशको मन्त्रालय र मन्त्रीको जिम्मेवारीका समबन्धमा छलफल भएको बालुवाटार स्रोतले जानकारी दिएको छ ।
मुख्यमन्त्री अधिकारीले नेकपा एमालेका अध्यक्ष केपि शर्मा ओलीसँग भने सोमबार साँझ नै भेटघाट गरेका हुन् । दुवै नेतालाई भेट गरीसकेकाले मुख्यमन्त्री अधिकारी आजै पोखरा फर्किने छन् । राजधानीबाट फर्केपछि मुख्यमन्त्री अधिकारीले गण्डकीको मन्त्रिपरिषद् विस्तार गर्ने जनाएका छन् ।
