बागलुङ/ नेकपा एमालेकी सचिव पद्मा अर्यालले दश दलिय गठबन्धन सरकारले देशको अर्थतन्त्र संकटमा धकेलेको आरोप लगाएकी छन् । गठबन्धनको नाममा सरकार भागवण्डामा भुलिरहेको भन्दै अर्यालले अर्थतन्त्र ध्वस्त बनाउन गठबन्धनमा सहभागी दल र वर्तमान सरकार लागिपरेको उनको आरोप थियो ।
प्रमुख प्रतिपक्ष नेकपा एमाले देश आर्थिक रुपमा संकटमा पुग्दा चुप लागेर बस्न नहुने भन्दै तत्काल संघर्षमा जानुपर्ने बताईन् । देशको अर्थतन्त्र धरापमा परेका बेला प्रतिपक्षमा रहेर सरकारलाई खबरदारी गर्न एमाले तयारी अबस्थामा रहेको उनको भनाई थियो ।
नेकपा एमाले बागलुङ नगर कमिटिले आयोजना गरेको ‘मिसन ग्रासरुट’ अभियानको समिक्षा कार्यक्रमलाई बिहिबार बागलुङमा सम्बोधन गर्दै अर्यालले अहिलेको सरकार जनता र राष्ट्रियताको पक्षधर नभएको जिकिर गरिन् । उनले यो सरकारले कुनैपनि बिकास निर्माण र राष्ट्रहितका काम गर्न नसक्ने बताईन् ।
एमालेले चलाईरहेको ‘मिसन ग्रासरुट’ अभियानले पार्टीका नीति र कार्यक्रम तल्लो तहसम्म पुगेको भन्दै अर्यालले पार्टीले जनमुखी अभियानलाई जारी राख्ने बताईन् । उनले पार्टीका नेता कार्यकर्तालाई निर्वाचनको समयमा मात्र नभई जनताका हरेक सुखदुखमा साथमै रहन निर्देशन समेत दिईन् ।
कार्यक्रममा नेकपा एमाले पोलिटव्युरो सदस्य जगत विश्वकर्माले ‘मिसन ग्रासरुट’अभियानले जनतामा नयाँ उर्जा ल्याएको दाबी गरे । उनले हरेक कार्यकर्ता पार्टीका निम्ति अभियानमा खटिरहेको भन्दै एमालेको सन्देश घर घरमा पुगेको दावी गरे ।
नेकपा एमाले बागलुङका अध्यक्ष हिराबहादुर केसीले बागलुङमा ८५ वटै वडामा प्रभावकारी ढंगले अभियान सञ्चालनमा रहेको बताए । नगर अध्यक्ष धनबहादुर परियारको अध्यक्षता, उपाध्यक्ष खिमराज सापकोटाको स्वागत र सचिव रामकृष्ण शर्माको सञ्चालनमा कार्यक्रम सम्पन्न भएको थियो ।
