पोखरा/ गण्डकी प्रदेशमा भएको नवौं राष्ट्रिय खेलकुद प्रतियोगितामा खेलाडीले पाउनुपर्ने भत्ता गण्डकीका प्रशिक्षकले लिएको खुलेको छ । गत असोज २८ गतेदेखि कार्तिक ३ गतेसम्म गण्डकी प्रदेशको विभिन्न स्थानमा सञ्चालन भएको नवौं राष्ट्रिय खेलकुद प्रतियोगिता हुनुभन्दा अघि गण्डकी प्रदेशले गरेको बन्द प्रशिक्षणमा सहभागि भएका खेलाडीको भत्ता प्रशिक्षकले खाएको स्रोतले बताए ।

केहि खेलमा खेलाडीको रकम प्रशिक्षकले लिएको खुलेको हो । कराते, एथलेटिक्स, ट्राइयाथोलनलगायतको खेलमा खेलाडीको रकम प्रशिक्षकले लिएको भेटिएको हो । खेलाडीलाई थाहै नदिई उनीहरुले रकम लिएका हुन् । नवौं राष्ट्रिय खेलकुदमा गण्डकीको प्रतिनिधित्व गरेका एक खेलाडीले प्रशिक्षकलेनै भत्ता खाइदिएको बताए ।

उनले नवौं मात्र नभई धेरै पटक भत्ता वा खेलाडीको लागि आउने सुविधा लिने गरेको बताए । विरोध गर्ने वित्तिकै खेल्न नपाउने धम्की आउने गरेको समेत सुनाए ।

‘भत्ता यति आउँछ भन्छन् तर हामीले पाउँदैनौं । भत्ता भनेको एउटा हुन्छ पाउँछौ अर्को’ उनले भने । नवौं राष्ट्रिय खेलकुद प्रतियोगितामा गुरुले नै रकम कुम्ल्याएको ति खेलाडीले बताए । युवा तथा खेलकुद मन्त्रालय एक कर्मचारीले पोखराको खेलकुदमा डन हरु हाबी भएको बताए । उनले खेलाडीको भत्तानै प्रशिक्षकले खादाँ समेत केहि गर्न नसकेको बताए । यस्तै एक प्रशिक्षकले नवौं राष्ट्रिय खेलकुद प्रतियोगिता सकिए पश्चात करातेमा रकम खाएको गुनासो खेलाडीले गरेको थियो । तर आगामी दिनमा खेल्न नपाउने डर भएपनि उजुरी दिन नसकेको उनले बताए । ‘नवौं राष्ट्रिय खेलकुद प्रतियोगित सकिएलगत्तै गुनासो आयो । विचरा खेलाडीको भत्ता नै प्रशिक्षकले खाइदियो तर केहि गर्न सकिएन’ उनले भने, ‘यहाँ त खान पल्केका हरुमात्रै छन् । खाली खेलकुदको नाम बेच्ने अनि खानेहरुको कमि छैन् । गुनासो आएपछि उजुरी दिन आग्रह गर्दा खेल्न नपाउने डरले दिनै मानेनन । खेलाडीमाथि अन्याय भइरहेको छ ।’

प्रदेश खेलकुद परिषद्का लेखा अधिकृत निलकण्ठ ढकालले केहि गुनासोहरु आएको बताए । उनले नवौं राष्ट्रिय खेलकुद प्रतियोगितामा खेलाडीको भत्ता लिएको जानकारी दिए । उनका अनुसार कार्यालयबाट रकम लगेर खेलाडीलाई दिएका छैनन् । ‘चार पाँच जनाको गुनासो आएको हो दुई जनाको समाधान भइसक्यो । कार्यालयबाट पैसा बुझेर लिए गए । खेलाडीको सहि पनि गराए तर पैसा खेलाडीलाई बुझाएनन्’ खेलाडीको भत्ता खाने खेल मध्ये ट्राइयाथोलन र एथलेटिक्सको एक विधाको समाधान भइसकेको छ । खेलाडी बाहिर आए राम्रो खेलेपनि चान्स नै पाउँदैन भन्ने डरले बोल्न नमानेको उनले सुनाए । युवा तथा खेलकुद महाशाखाका उप सचिव तथा प्रदेश खेलकुद परिषद्का निवर्तमान सदस्य सचिव घनश्याम पौडेलले क्षेत्रीय संरचनाका कारण खेलकुदमा व्यथियत देखिएको बताए । उनले संघीयतामा गइसक्दा समेत संघीय सरकार अन्तरगत रहेको खेलकुद विभाग संघीयतामा नजादा निकै समस्या आइरहेको सुनाए । उनले रंगशालामा नयाँ खेलाडीले खेल्ने अवसर नै नपाएको समेत बताए ।

‘सिस्टम अनुसार गठन छैन । तिनैलाई डनले चलाएका छन । खेलकुदमा डनहरुको हालिमुहाली छ’ उनले भने, ‘आफ्नो मान्छे मात्र छनोट गर्छन् । शुद्द रुपले दिदैन । यहाँत खेलाडीको भत्ता समेत खाने चलन अझै छ । नवौ राष्ट्रिय खेलकुदमा पनि त्यो घटना घटेको थियो ।’ पौडेलले खेल संघहरुले बजेट सक्ने काम गर्नु बाहेक अन्य कुनै काम नगरेको बताए । उनले खेलकुदमा व्यक्तिगत लागनी भएपनि खेल संघहरु सिस्टममा नभएको बताए । खेलकुद प्रदेश मातहातमा नआउनु ठुलो खतरा रहेको उनको भनाइ छ । राखेपको टेक्ने ठाउँ क्षेत्रीय खेलकुद भएको र प्रदेश खेलकुद परिषदलाई वेवास्ता गर्दा आर्थिक अनियमितता हुने गरेको उनको भनाई थियो । नवौंको बेला क्योकुसिन कान कराँतेमा पटक हासिल गर्ने भन्दै खेलाडीलाई मनाङ लगेर प्रशिक्षण गराईएको थियो । उक्त प्रशिक्षणको समयमा समेत विवाद भएको खुलेको छ । उक्त प्रशिक्षणका लागि जानुपर्ने सबै टिम नगएको खुलेको हो । उक्त खेलमा एक दिन प्रशिक्षण गराएर प्रशिक्षक बनेको समेत प्रदेश खेलकुद परिषदमा गुनासो परेको थियो । स्रोतकाअनुसार खेलाडीको सेवा सुविधा खेलाडीकै खातामा हाल्ने व्यवस्था गरिदिए त्यस्ता प्रवित्तृको अन्त्य हुनेछ ।

नवौं राष्ट्रिय खेलकुद प्रतियोगितामा नेपाली सेनाको विभागीय टिम त्रिभुवन आर्मी क्लब १ सय ७२ स्वर्ण पदकसहित कुल ३ सय ७१ पदकका साथ टिम च्याम्पियन भएको थियो । गण्डकी प्रदेश प्रदेशतर्फ पहिलो रह्यो । एपीएफ ६५ स्वर्ण, ७३ रजत र ८१ कास्य पदकसहित कुल २ सय १९ पदक जित्दै दोस्रो भयो । पुलिसले ६१ स्वर्ण, ६० रजत र ७३ कास्य सहित कुल १९४ पदक जित्दै तेस्रो स्थान हासिल गरेको थियो । गण्डकी प्रदेशले ३२ स्वर्ण, ३१ रजत र ५७ कास्य सहित कुल १२० पदक जित्दै चौंथो स्थान हासिल गरेको थियो । बागमती प्रदेशले २४ स्वर्ण, ४७ रजत र ७४ कास्य पदक सहित कुल १४५ पदक जितेर पाँचौं स्थानमा रहेको थियो ।