म्याग्दी/गण्डकी प्रदेशका स्वास्थ्य मन्त्री कृष्णप्रसाद पाठकले समाजमा नसर्ने रोगको जोखिम बढिरहेको बताउँदै त्यसको न्यूनीकरणका लागि प्रदेश सरकारले काम गरिरहेको बताएका छन् । बेनी नगरपालिका ९ घतानमा सोमबारदेखि आयोजना भएको नसर्ने रोगहरूको बृहत स्क्रिनिङ शिविरको उद्घाटन गर्दै मन्त्री पाठकले विकासोन्मुख देशको प्रमुख समस्याको रूपमा नसर्ने रोगको प्रकोप बढिरहेको बताए ।
उनले अहिले प्रदेश सरकारले स्थानीय पालिकाहरूको समन्वयमा नसर्ने रोगहरूको समुदायस्तरमै गएर खोजी गरी नागरिकलाई स्वास्थ्य पहुँच पुर्याउने अभियान चलाइरहेको जानकारी दिए ।
ग्रामीण भेगमा स्वास्थ्य सेवाको पहुँच नपुग्नु र नागरिक पनि सचेत नहुँदा नसर्ने रोगीहरूको संख्या उल्लेख्य भएको बताउँदै मन्त्री पाठकले त्यसको निराकरणमा प्रदेश सरकारले काम गरिरहेको बताए । अत्याधुनिक एआइ एक्सरे मेसिनमार्फत समुदायस्तरमै पुगेर छाती रोगको पहिचान गरी नागरिकलाई उपचारमा सहजीकरण गरिरहेको उनको भनाई थियो ।
बेनी नगरपालिकाका नगरप्रमुख सुरज केसीले जेष्ठ नागरिक र ‘क’ वर्गका अपाङ्गता भएका नागरिकहरूको घरघरमै पुगेर स्वास्थ्य जाँच गर्ने काम नगरपालिकाले समेत गरिरहेको जानकारी दिए । प्रत्येक महिनाको १५ गते नसर्ने रोगको स्क्रिनिङ शिविर नगरपालिकाले सञ्चालन गर्दै आएको केसीले बताए ।
उद्घाटन कार्यक्रम वडा अध्यक्ष चक्र केसीको अध्यक्षता, बेनी नगरपालिकाका उप–प्रमुख ज्योति लामिछानेको स्वागत र बेनी नगरपालिका स्वास्थ्य शाखाका लिला गौतमको सञ्चालनमा सम्पन्न भएको थियो ।
शिविर गण्डकी प्रदेश स्वास्थ्य निर्देशनालय पोखरा बेनी नगरपालिका र बेनी अस्पतालको सहकार्यमा सञ्चालन गरिएको हो । शिविरमा संकलित नमुना बेनी अस्पताल र धौलागिरी अस्पताल बागलुङमा परीक्षण गरी बिरामीहरूको पहिचान गरिने बेनी अस्पतालका मेडिकल सुपरटेन्डेन्ट डा. रविरञ्जन प्रधानले जानकारी दिए ।