बागलुङ/अविरल वर्षासँगै खोलामा आएको बाढी र गेग्रानकाले बागलुङमा लघुजलबिद्युत आयोजना, पुल र घरहरुमा क्षती पुर्याएको छ । बागलुङको जैमिनी नगरपालिका–९ पैयुथन्थापहुँदै बग्ने कालुङ्खोले सोही ठाउँमा रहेको उपल्लो कालुङ्खोला लघु जलबिद्युत आयोजना बगाएको हो ।
बुधबार बिहानपख आएको बाढीले आयोजनाको बाँधसँगै पावरहाउस बगाएको स्थानीय गंगा आचार्यले बताए । आयोजनाका प्राबिधिक राम बहादुर क्षेत्रीले रातीनै भागेर ज्यान जोगाए । खोलामा बाढी आएपछि रातको समयमा भागाभाग भएको थियो । खोलाले गत बर्ष ३५ लाख खर्चेर निर्माण गरिएको स्टिल पुल समेत बगाएको आचार्यले बताए । बाढीले केन्द्रिय बिद्युत प्रसारण लाईनको ट्रान्सफर्मरमा समेत क्षती पुर्याएको छ । स्थानीय बिद्युत आयोजना बग्ने र केन्द्रिय बिद्युतको प्रसारण रोकिएपछि पैञ्युथन्थापका १३० घर अन्धकारमा छन् । स्थानीय उद्योगहरु समेत बिद्युत नभएका कारण बन्द भएका छन् ।
बाढी घरघरमै पसेपछि पैञ्युथन्थापकै खरेयाबोटका दुई घर परिवार बिस्थापित भएका छन् । ७ परिवार बाढी र पहिरोको जोखिममा रहेको आचार्यले बताए । बाढीले खोला छेउका खेतियोग्य जमिनमा केही दिन अघि लगाईएको धानबाली सखाप पारेको जैमिनी नगरपालिकाका उपप्रमुख हरिहर शर्माले बताए । बाढीका कारण भएको क्षतीको बिबरण आउन अझै बाँकी छ । घटनास्थलमा प्रहरी पुग्दै छ ।
