स्याङ्जा/डिभिजन खानेपानी तथा सरसफाइ कार्यालय स्याङजाले खानेपानी योजनाको लागि विद्युत महशुल अनुदान दिएको छ । आर्थिक वर्ष ०८१/८२ मा लिफ्टिङ खानेपानी योजनाको एक करोड ३३ लाख ६४ हजार ६५६ रुपियाँ विद्युत महशुल कार्यालयले अनुदान दिएको हो ।
प्रदेश सरकारले लिफ्टिङ खानेपानीमा लाग्ने विद्युत महशुलमा अनुदान दिने नीति ल्याएसँगै कार्यालयले आफ्नो मातहतका स्याङ्जा र कास्कीका १ सय ६९ योजनालाई अनुदान दिएको हो । कार्यालय मातहत रहेका स्याङ्जाका १ सय ३३ योजनाका लागि ८६ लाख ७८ हजार ८४ रुपैयाँ र कास्कीका ३६ योजनाका लागि ४६ लाख ८६ हजार ५ सय ७२ रुपैयाँ दिएको हो । लिफ्टिङ योजनाबाट कास्कीका १३ हजार ८ सय ८ र स्याङ्जाका २१ हजार ९ सय ६४ गरी ३५ हजार ७ सय ७२ लाभान्वित भएका छन् ।
कार्यालयका प्रमुख हरिप्रसाद तिमिल्सिनाले लिफ्टिङ खानेपानी आयोजनामा विद्युत् महशुल अनुदान सम्बन्धी मापदण्ड २०७९ का आधारमा मासिक रुपमा २५ हजार रुपैयाँ सम्मको विद्युत खपत गर्ने लाभग्राहीलाई शत प्रतिशत अनुदान दिइएको बताए । मासिक २५ हजारदेखि ४० हजार सम्मको महशुलमा ७५ प्रतिशत र मासिक रुपमा ४० हजारदेखि ६० हजारसम्मको विद्युत् खपतमा ५० प्रतिशत र ६० हजारदेखि ८० हजारसम्ममा २५ प्रतिशत अनुदान प्राप्त गरेको तिमिल्सिनाले बताए ।
यस्तै मासिक रुपमा ८० हजारभन्दा बढीको विद्युत खपत गर्ने योजनामा १० प्रतिशत अनुदान कार्यालयले उपलब्ध गराएको हो । तीन चरणमा वा सो भन्दा बढी चरणको हकमा भने ४० हजार सम्म ९० प्रतिशत, ६० हजार सम्म ६५ प्रतिशत, ८० हजार सम्म ४० प्रतिशत र ८० हजार बढीमा १५ प्रतिशत अनुदान दिइएको हो । सरसफाई कार्यालय स्याङ्जामा २४७ खानेपानी योजना रहेकोमा १० वटा पूर्ण रुपले निर्माण सकिएको हो । इन्जिनियर कमल बरालले यो आर्थिक वर्षमा सकिएका योजनाबाट एक हजार ५ सय ८६ योजना निर्माण सम्पन्न भएको र आठ हजार ८९ लाभान्वित भएको जानकारी दिए ।
प्रदेश सरकार बनेसँगै १ सय ६१ योजना पूर्ण रुपमा सम्पन्न भएको बताउदै इन्जिनियर बरालले २३ हजार ४३ घरमा धारा निर्माण भएको र एक लाख १७ हजार ५ सय १७ जिल्लावासी लाभान्वित भएको सुनाए । आब ०८१/०८२ मा ९५ प्रतिशत वित्तिय प्रगति भएको र २३ करोड तीन लाख ४६ हजार रुपैयाँ खर्च भएको बरालले बताए ।
