तनहुँ/तनहुँ प्रहरीले लागुऔषधसहित एक जनालाई पक्राउ गरेको छ । तनहुँको आँबुखैरेनी गाउँपालिका–४ स्थित पृथ्वी राजमार्गको सडक खण्डमा विशेष जाँचका क्रममा लागूऔषधसहित पोखरा महानगरपालिका–१६ बस्ने २४ वर्षिय सन्तोष तामाङलाई प्रहरीले पक्राउ गरेको हो ।
इलाका प्रहरी कार्यालय आँबुखैरेनीबाट खटिएको प्रहरी टोलीले सवारी साधन तथा शंकास्पद व्यक्तिहरूको निगरानी गर्दै खोजतलास गर्ने क्रममा ती युवकको साथबाट लागूऔषध बरामद गरेको हो । प्रहरीले ट्रामाडोल हाइड्रोक्लोराइड क्याप्सुल लेखिएको ८४ पत्ता, अर्थात् ८ सय ४० वटा क्याप्सुल फेला परेको इलाका प्रहरी कार्यालय आँबुखैरेनीका प्रहरी निरीक्षक टेक प्रसाद सुबेदीले बताए ।
तामाङविरुद्ध लागूऔषधसम्बन्धी मुद्दामा थप अनुसन्धान भइराखेको प्रहरीले बताएको छ ।
