बागलुङ/तीजको अवसर पारेर न्यू एभरेष्ट एकेडेमीले साँस्कृतिक कार्यक्रम सञ्चालन गरेको छ । विद्यालय परिसरमै विद्यार्थी, शिक्षक र अभिभावक जम्मा गरेर विविध साँस्कृतिक कार्यक्रम सञ्चालन गरिएको हो ।
विद्यालयले शिक्षक र अभिभावकका बीचमा साँस्कृतिक नृत्य प्रतियोगिता गरेको हो । अभिभावकहरुका तर्फबाट सात समुह सहभागि थिए । त्यस्तै शिक्षकहरुका समुह बनाएर प्रतिस्पर्धा गराईएको थियो भने विद्यार्थीहरु बीच प्रतियोगितात्मक र नमुना नृत्यहरु प्रस्तुत गरिएको थियो । कला र संस्कृतिको विषयमा व्यवहारिक ज्ञानका लागि हरेक चाडपर्वको समयमा विविध कार्यक्रम गर्ने गरेको विद्यालयका प्रधानाध्यापक कृष्ण अधिकारीले बताए ।
कार्यक्रममा परम्परा झल्काउने सचेतनामुलक सडक नाटक प्रस्तुत गरिएको थियो । कार्यक्रममा विद्यार्थीहरु करुणा आचार्य, सुदिन अर्याल, शिक्षकहरु पुष्पा अधिकारी, सुशिला खड्का लगायतले बोलेका थिए । विद्यालयका प्रधानाध्यापक कृष्ण अधिकारीको अध्यक्षता तथा कक्षा १० की छात्रा अनुशा कँडेलको सञ्चालनमा कार्यक्रम सम्पन्न भयो ।
