बागलुङ/बागलुङमा मेयर कप फुटबल प्रतियोगिता हुने भएको छ । बागलुङ नगरपालिका नगर खेलकुद विकास समितिको आयोजनामा आगामी मंसिर १४ देखि १८ गतेसम्म संचालन गर्नेगरी ‘मेयर कप’ फुटबल प्रतियोगिताको तयारी गरिएको हो ।
बागलुङ नगरपालिका वडा नं. १ रामरेखास्थित बाङ्ेचौर खेल मैदानमा हुने प्रतियोगिताको आवश्यक तयारी सुरु गरिएको खेल संयोजक सुदीप गौतमले बताए । नगरपालिका स्तरीय प्रतियोगितामा बढीमा दस टिम सहभागी हुने गौतमले जानकारी दिए ।
खुला प्रतियोगिता भएकाले देशभरका जनुसुकै नगरपालिकाले पनि आफ्नो आधिकारिक टिम पठाउन सक्ने छन् । संयोजक गौतमका अनुसार, आयोजक बागलुङ नगरपालिकाको दुई टिमले प्रतियोगितामा सहभागिता जनाउने छन् । बागलुङ नगरपालिकाले २०७६ सालमा दोस्रो मेयर कप गरेपछि स्थगित भएको मेयर कप फुटवल प्रतियोगिता यस वर्षदेखि पुनः गर्ने गरी तयारी थालिएको गौतमले बताए ।
प्रतियोगिताको विजेता टिमलाई ३ लाख ३३ हजार ३ सय ३३ रुपैयाँ नगदसहित ट्रफी र मेडल प्रदान गरिने छ । उपविजेतालाई २ लाख २ हजार २ सय २२ रुपियाँ पुरस्कार प्रदान गरिने छ भने सर्वाधिक गोलकर्ता, सर्वोत्कृष्ट खेलाडी र सर्वोत्कृष्ट प्रशिक्षकलाई १० हजारका दरले पुरस्कार प्रदान गरिने संयोजक गौतमले जानकारी दिए ।
