पोखरा/ पोखरा– २७ रिठेपानीस्थित लिटल फ्लावर एजुकेशनल सेकेण्डरी स्कुलमा विद्यालयको वार्षिक कार्यक्रम अन्तर्गत स्पोर्टस् मिट बुधवारदेखि सुरु भएको छ ।
स्पोर्टस् मिटको वडाध्यक्ष पूर्णकुमार गुरुङ्गले उद्घाटन गर्दै लिटल फ्लावर स्कुलले चेतनाका साथै विकृति र विसङ्गति विरुद्घ समाजमा अग्रसरता देखाएकामा प्रशंसा गर्दै पढाइको साथसाथै खेलकुदका माध्यमले पनि विद्यार्थीहरुलाई अगाडि वढाउने उदेस्य राख्नु सराहनीय रहेको वताए । अधिकांश गुरुङ्ग र भूपूहरुको बस्ती रहेको रिठेपानीमा विगत ३० वर्ष अगाडि विद्यालय स्थापना गरी समाज परिवर्तनमा योगदान पु¥याएकामा विद्यालयकी संस्थापकद्वय देवी खड्का र कमल खड्काप्रति आभार व्यक्तसमेत उनले गरे ।
कार्यक्रममा एन प्याव्सन केन्द्रीय सहकोषाध्यक्ष शिवदत्त तिवारीले शुभकामना दिदै खेलमा उत्कृष्टता हासिल गर्न विद्यार्थीलाई प्रेरित गरे । विद्यालयका प्रिन्सिपल बिकल पौडेलले खेलकुदको विकासका लागि विद्यालयले विभिन्न खेल अभियानमा जोड दिएको वताउदै खेलकुद हारजितको लागि भन्दापनि विद्यार्थीको सर्वाङ्गिण विकासको लागि आयोजना गरिएको बताए । कक्षा ११, १२ संयोजक बिष्णुहरि पौडेलले स्वागत मन्तव्य राख्दै कार्यक्रम माथि प्रकाश पारेका थिए ।
कार्यक्रममा वडा सदस्य जितेन्द्र क्षत्री, विद्यालय सञ्चालक अध्यक्ष देवी प्रधान खड्का, राइजिङ्ग स्टार युवा क्लबका पूर्व अध्यक्ष विष्णुप्रसाद गुरुङ्ग, प्रगतिचोक आमा समाजकी अध्यक्ष देवी गुरुङ्ग, विद्यार्थी सुदिक्षा पौडेल, खेल प्रशिक्षकहरु शम्भू केसी, शंकरप्रसाद शाह, अनिश गुरुङ्ग लगायतले शुभकामना व्यक्त गरेका थिए । अतिरिक्त क्रियाकलाप संयोजक ध्रुव सुवेदीले बार्षिक कार्यक्रम अन्तरगत स्पोर्टस् संचालन गरिएको र खेलकुद अन्तरगत विभिन्न दुरीका दौड, रिले, भलिवल, फुटवल, बास्केट बल, ब्याडमिन्टन, टेबल टेनिस लगायत खेल सिनियर र जुनियर समूहमा खेलाईने वताए ।
कार्यक्रमको सञ्चालन एकडेमिक डिन विचित्र न्यौपानेले तथा अध्यक्षता विव्यस अध्यक्ष तिलकसिंह गुरुङ्गले गरेका थिए । विव्यस सल्लाहकारहरु क्या इन्द्रबहादुर गुरुङ्ग र क्या गणेशप्रसाद गुरुङ्गले विद्यार्थीहरुले प्रस्तुत गरेका मार्च पासको मूल्याङ्कन गरेका थिए । शुभारम्भ कार्यक्रमका अवसरमा विद्यार्थीहरुले म्यूजिकल पिटी प्रदर्शन गर्नुका साथै साँस्कृतिक प्रस्तुति समेत राखेका थिए ।
