पोखरा/तामाको तार बेचेर खाएको आरोपमा अख्तियारले तत्कालीन केन्द्रप्रमुख, स्टोरप्रमुख र कान्तिपुर सेक्युरिटी प्रालिविरुद्ध मुद्दा दर्ता गरेको छ ।
मंगलबार अख्तियारले नेपाल विद्युत प्राधिकरणका तत्कालीन केन्द्र प्रमुख राजीवकुमार सिंह, तत्कालीन सहायक लेखा अधिकृत (स्टोर प्रमुख) लोकप्रसाद काफ्ले र कान्तिपुर सेक्युरिटी सर्भिस प्रालिका सेक्युरिटी गार्ड रामकुमार पुर्जा र हेमशर्मा रिमालविरुद्ध मुद्दा दर्ता गरेको हो ।
उनीहरुविरुद्ध ९०० मिटर तार बेचेर खाएको आरोप छ । छानबिनका क्रममा ७० वर्गमिलिमिटरको १७४ मिटर र १२० वर्गमिलिमिटरको ७४६ मिटर तार हराएको उल्लेख छ । यसको परिणाम १३ लाख ९३ हजार ६०३ रुपैयाँ बराबरको हुने उल्लेख छ ।
नेपाल विद्युत प्राधिकरण पोखरा वितरण केन्द्रका स्टोर प्रमुखले २०८० वैशाख ५ गते कार्यालय प्रमुखसमक्ष तार हराएको निवेदन दिएपछि छानबिन समिति गठन गरिएको थियो । समितिको प्रतिवेदन अनुसार यति ठूलो परिमाणको तार मेशिन उपकरण प्रयोग गरी योजनाबद्ध तवरबाट कम्पाउण्ड बाहिर लगिएको देखिएको छ ।
छानबिनमा स्टोर प्रमुख, सुरक्षा गार्ड र केन्द्र प्रमुखको मिलेमतो देखिएको उल्लेख गरिएको छ । सुरक्षा गार्डहरू ड्यूटीमै रहेको समयमा तार बाहिर लैजान सहयोग भएको निष्कर्ष निकालिएको छ । साथै, गेटपासमार्फत ठेकेदारले लगेको भनिएको तार मौखिक निर्देशनका आधारमा स्टोर फिर्ता गरिएको भनिए पनि सो परिमाणको तारसमेत फेला नपरेको प्रतिवेदनमा उल्लेख छ ।
प्रतिवादीहरूले आपसी मिलेमतोमा आफूलाई गैरकानूनी लाभ दिलाउने तथा सार्वजनिक संस्थालाई हानिनोक्सानी पु¥याउने बदनियतले कार्य गरेको ठहर गरिएको छ । अख्तियारको अभियोगपत्र अनुसार प्रतिवादीहरूको कार्य भ्रष्टाचार निवारण ऐन, २०५९ को दफा १७ बमोजिम कसूर ठहर भएकाले बिगो असुल उपर तथा कानुनअनुसार सजायको मागदाबी लिई मुद्दा दायर गरिएको हो ।
