पोखरा / फागुन २१ गते हुने प्रतिनिधिसभा निर्वाचनका लागि नेपाली कम्युनिस्ट पार्टी (नेकपा) ले गण्डकीका १८ वटै निर्वाचन क्षेत्रमा उम्मेदवार टुंगो लगाएको छ । नेकपाले काठमाडौंमा उम्मेदवारलाई नै बोलाएर टिकट थमाएको हो । नेकपाले गोरखा–१ मा हरिराज अधिकारी (कुमार) उम्मेदवार बनेका छन् भने २ मा नेता लेखनाथ न्यौपानेले टिकट पाएका छन् ।
तनहुँ–१ मा विद्यानाथ ढकाल र २ बाट सोमबहादुर थापा तथा लमजुङमा हरिजङ तामाङले टिकट पाएका छन् । प्रायः लमजुङबाटै चुनाव लडिरहेका देव गुरुङ यसपालि मनाङ जाने भएका छन् । उनको टिकट टुंगिन बाँकी भए पनि मनाङबाटै उम्मेदवार बन्ने पक्का भएको नेकपा स्रोतले जनाएको छ ।
कास्की–१ बाट राजकाजी गुरुङ (करण), २ बाट हेमबहादुर थापा (किरण) र ३ बाट प्रेम पौडेलको नाम आएको छ, यद्यपि उनको नाम टुंगिन बाँकी रहेको नेकपा गण्डकी अध्यक्ष गायत्री गुरुङले जानकारी दिइन् । पर्वतबाट पूर्वपत्रकार मनहरी तिमिल्सिना उम्मेदवार बनेका छन् भने म्याग्दीबाट अर्जुन थापा उम्मेदवार बनेका छन् । बागलुङ–१ बाट कृष्ण केसी र २ बाट ज्ञामनाथ गैह्रे उम्मेदवार बन्दा मुस्ताङमा ङुटुक गुरुङलाई छानिएको छ ।
स्याङजा–१ बाट शैलेन्द्र घिमिरेले टिकट पाउँदा २ बाट पदम विक छानिएका छन् । नवलपुर १ मा लोक प्रसाद भुर्तेल र २ बाट गणेशमान महतो उम्मेदवारका रूपमा टुंगिएका छन् । गत निर्वाचनमा नेकपा आबद्ध प्रमुख दल नेकपा माओवादीले गोरखा १ र बागलुङ २ मा निर्वाचन जितेको थियो ।
