म्याग्दी/फागुन २१ गते हुने प्रतिनिधिसभा निर्वाचनका लागि म्याग्दीमा सुरक्षाकर्मी तथा कर्मचारी खटनपटनसँगै तयारी पुरा भएको जिल्ला सुरक्षा समितिले जनाएको छ । समितिका अनुसार कर्मचारी तथा निर्वाचन प्रहरी खटाइएसँगै तयारी पुरा भएको हो ।

जिल्ला प्रहरी कार्यालयले निर्वाचनमा खटिने निर्वाचन प्रहरीको केन्द्र तय गरेर मतदान स्थलतर्फ खटाएको छ । मंगलबार निर्वाचन प्रहरी खट्ने स्थलको टुंगो भएर सुचना प्रकाशन भएसँगै बुधबार बिहानैदेखि आफ्नो कार्यस्थलतर्फ निर्वाचन प्रहरीहरु खटेका छन् ।

यसैगरी मुख्य निर्वाचन अधिकृतको कार्यालयले निर्वाचनमा खट्ने मतदान अधिकृतसहित सबै कर्मचारीको टुंगो लगाएको छ । मुख्य निर्वाचन अधिकृत सूर्यबहादुर थापाका अनुसार मतदान स्थलमा खट्ने मतदान अधिकृत, सहायक मतदान अधिकृत, सहायक कर्मचारी र सहयोगी कर्मचारी तोकिएको हो ।

निर्वाचनमा खट्ने सबैको नामावली प्रकाशन गरिएको र १५ गते र १६ गते नियुक्तिपत्र दिएर मतदान स्थलमा खटाइने कार्ययोजना रहेको थापाको भनाई छ । सदरमुकामदेखि मतदान स्थलको दुरी अनुसार कर्मचारीहरु जाने भए पनि यहाँका सबै तयारी पुरा भएको उनको भनाई छ ।

जिल्लाका सबै मतदान स्थलको अनुगमन गर्नुका साथै सुरक्षा व्यवस्था बारेमा समेत चुस्तता दिएको प्रमुख जिल्ला अधिकारी रविन्द्र आचार्यले बताए । निर्वाचन सुरक्षा योजना बनाएर कार्यान्वयनमा पनि ल्याएको हुनाले निर्वाचन शान्तिपूर्ण तथा भयरहित वातावरणमा सम्पन्न हुनेमा आफू विश्वस्त रहेको उनको भनाई छ । मतपेटिका ढुवानी कार्ययोजना तयार भएको समेत प्रजिअ आचार्यले बताए ।

अहिले निर्वाचनको तयारी पुरा भएको छ, अब मतदान र मतगणना मात्रै बाँकी छ । ‘कर्मचारी खटनपटन, मतदान अधिकृत र सहायक मतदान अधिकृतलाई तालिम दिएपछि निर्वाचनको सबै काम सकियो । अब मतदान र मतपेटिका ढुवानी अनि गणना मात्रै बाँकी रह्यो, अरु सबै सकियो’ उनले सुनाए ।

प्रतिनिधि सभातर्फ एउटा मात्रै निर्वाचन क्षेत्र रहेको म्याग्दीमा ८२ वटा मतदानस्थलमा एक सय २० मतदान केन्द्र कायम गरिएको छ । त्यस्तै जिल्ला कारागारमा रहेका कैदीबन्दीका लागि कारागारमा एउटा र कर्मचारीहरुका लागि कर्मचारी मिलन केन्द्रमा दुई वटा अस्थायी मतदान स्थल कायम गरिएको छ ।

जिल्ला सुरक्षा समितिले भौगोलिक अवस्था र सुरक्षाका हिसाबले १५ वटा अति संवेदनशील, ५८ वटा संवेदनशील र ८ वटा मतदानस्थललाई समान्य भनेर वर्गिकरण गरेको छ । एउटा निर्वाचन क्षेत्र रहेको म्याग्दीमा ४४ हजार ६४ महिला, ४२ हजार तीन सय ३२ पुरुष एक जना अन्य गरी कुल ८६ हजार तीन सय ९७ मतदाता रहेका छन् ।