बागलुङ / प्रतिनिधी सभा सदस्यको लागि विहिवार भएको मतदानमा बागलुङमा ५०.१९ प्रतिशत मत खसेको छ । जिल्लाभर ९७ हजार ५० मत खसेको बागलुङका सहायक प्रमुख जिल्ला अधिकारी नवराज बरालले जानकारी दिए ।
उनका अनुसार कुल मतदाता मध्ये ५२ हजार ८८१ महिला, ४४ हजार १६८ पुरुष र एक अन्य गरी ९७ हजार ५० मत खसेको हो । जिल्लामा कुल १ लाख ९३ हजार ३८१ मतदाता छन् । १० स्थानीय तह रहेको बागलुङमा अहिले दुवै निर्वाचन क्षेत्रका मत पेटिका संकलन भइरहेको छ । राती अवेरसम्म मतपेटिका संकलन भइसक्ने र भोली विहानबाट मतगणना हुने निर्वाचन कार्यालयले जनाएको छ । दुई प्रतिनिधिसभा सदस्यका लागि २३ जना उम्मेदवार चुनावी मैदानमा छन् ।