गोरखा/ जिल्लाको गोरखा नगरपालिका–११ को बाह्रहकिलो बजारमा वन क्षेत्र अतिक्रमण गरी बनाइएका टहरा स्थानीय आफैँले हटाउन थालेका छन् ।
नगरपालिका, जिल्ला प्रशासन कार्यालय, डिभिजन वन कार्यालय तथा ओख्लेपाखा सामुदायिक वन उपभोक्ता समूहको संयुक्त पहलपछि सार्वजनिक जग्गामा २० वर्षदेखि सञ्चालनमा रहेको सो बजारका संरचनालाई हटाउन लागिएको हो । यसका लागि डिभिजन वन कार्यालय गोरखाले असार ३० गतेभित्र अतिक्रमित जग्गाका संरचना हटाउन आग्रह गरेको थियो ।
निरन्तरको सूचना र समन्वयपछि पसलवालाहरूले मङ्गलबार स्वःस्फुर्त आफ्ना घरटहरा खाली गरेका हुन् । सार्वजनिक जग्गा हडपेर बनेका घरटहरा हटाउने गोरखा नगरपालिकाको कार्यपालिकाले निर्णय गरेको थियो । सोही निर्णयपछि जिल्ला प्रशासन कार्यालयसँग समन्वय गरी वन डिभिजन कार्यालय, सबडिभिजन कार्यालय, ओख्लेपाखा सामुदायिक वन उपभोक्ता समूहले सो सार्वजनिक जग्गा खाली गर्न सूचित गरेको थियो ।
बारम्बार लिखित तथा मौखिक गरेर सार्वजनिक जग्गा खाली गर्न आह्वान गरेपछि पसल धनीहरूले घरटहरा खाली गरेका वन डिभिजन कार्यालयका प्रमुख मदनमोहन शाण्डिल्यले जानकारी दिए । सबै घरटहरा खाली भइसकेपछि त्यसलाई हटाएर वन क्षेत्रलाई तारबार गरी सुरक्षित गरिने उनको भनाई छ ।
आँबुखैरेनी–गोरखा सडकबाट छेपेटारतर्फ जाने चोकमा सार्वजनिक जग्गा कब्जा गरी विगत २० वर्षदेखि बजार सञ्चालनमा छ । विसं २०७३ मा हटाउने प्रयास भए पनि केही समयपछि फेरि बजार पुनःस्थापित भएको थियो । “अब फेरि वनको जग्गा कब्जा गर्न नमिल्नेगरी तारबार गर्नेछौँ”, शाण्डिल्यले भने, “त्यसका लागि हामीले नापजाँच गरिसकेका छौँ ।”
बाह्रकिलोका टहरा हटाउन ओख्लेपाखा सामुदायिक वन उपभोक्ता समूहले असार ७ गते १३ गतेसम्मको समयसीमा तोक्दै अतिक्रमित क्षेत्र खाली गर्न निर्देशन दिएको थियो । तर स्थानीयले अटेरी गरेका थिए । अघिल्लो बुधबार पुनः डिभिजन वन कार्यालय गोरखाले असार ३० गतेभित्र संरचना हटाउन निर्देशन दिएको थियो । वन ऐन, २०७६ बमोजिम राष्ट्रिय वन क्षेत्रमा निषेधित कार्य गरेको पाइएकाले वन क्षेत्रको जग्गा खाली गरिएको डिभिजन वन कार्यालयले जनाएको छ ।
