बागलुङ, १९ बैशाख– बागलुङ नगरपालिका–२ माझकोट आनन्द चौपारीस्थित डेरा गरी बस्ने ३३ बर्षिया सम्झना किसानलाई आत्महत्या दुरुत्साहन गरेको अभियोगमा जिल्ला प्रहरी कार्यालय बागलुङका प्रहरी जवान राकेश दवाडीलाई हिरासतमा लिएको छ । तनहुँको व्यास नगरपालिका वडा नं. ८ का स्थायी बासिन्दा दवाडी जिल्ला प्रहरी कार्यालय बागलुङमा कार्यरत थिए ।
मृतक किसानले लेखेको सुसाइटनोट र परिवारले दिएको जाहेरीका आधारमा दवाडीलाई हिरासतमा लिई अनुसन्धान सुरु गरिएको हो । जिल्ला अदालत बागलुङबाट पाँच दिनको म्याद थप गरि अनुसन्धान थालिएको प्रहरी स्रोतले जनाएको छ । छोरीलाई आत्महत्या गर्न बाध्य पारिएको भन्दै मृतक सम्झना किसानका बुबा खडक बहादुर सार्कीले बुधबार जिल्ला प्रहरी कार्यालय बागलुङमा किटानी जाहेरी दिएका थिए ।
सार्कीले दिएको जाहेरीका आधारमा अनुसन्धानका लागि दवाडीलाई नियन्त्रणमा लिएर अनुसन्धान प्रक्रिया थालिएको प्रहरी निरीक्षक हेम केसीले जानकारी दिए । दवाडीविरुद्व आत्महत्या दुरुत्साहनअन्तर्गत मुद्धा दायर गर्ने तयारी भएको प्रनि केसीले बताए ।
गत भदौ १ गतेदेखि कार्यान्वयनमा आएको देवानी संहिता २०७६ ले आत्महत्या दुरुत्साहन गर्नेलाई समेत कारवाहीको व्यवस्था गरेको छ । आत्महत्या दुरुस्साहन मुद्धामा ५ वर्षसम्म कैद र ५० हजार जरिवाना हुने कानुनी व्यवस्था रहेको छ ।
किसान मंगलबार बिहान आँफु बस्दै आएको कोठाको सिलिङमा झुण्डिएको अवस्थामा फेला परेकी थिइन् । आत्महत्या गरेकी सम्झनाको कोठामा सुसाइटनोट फेला परेको थियोे । जिल्ला प्रहरी कार्यालयका प्रमुखलाई सम्बोधन गरि लेखिएको सुसाइटनोटमा त्यहीँ कार्यरत प्रहरी जवान राकेश दवाडीका कारण आफुले आत्महत्या गर्न बाध्य भएको उल्लेख छ ।
आत्महत्या गर्नुपुर्व सम्झनाले प्रहरी प्रमुखलाई सम्बोधन गरी लेखेको नोटमा दोषीमाथि आवश्यक छानवीन गरी कार्वाही गर्न अनुरोध गरिएको छ । २०७५ भदौ ५ गतेदेखि प्रहरी जवान दवाडीसंग चिनजान भई मायामा फस्दा बिचल्ली भई आत्महत्याको बाटो रोज्नु परेको सुसाइटनोटमा उल्लेख छ ।
दवाडीबिरुद्ध मुद्धा दर्ता भएर म्याद थप भएपछि परिवारले मृतक किसानको शवलाई शुक्रबार दाहसंस्कार गरेका छन् । प्रहरीले उनीहरुको सम्बन्ध, मोबाइलमा भएका पछिल्ला संवाद लगायतका बिषयमा अनुसन्धान थालेको छ । कानुन अनुसार, दोषी ठहर हुने अवस्था आए अदालतले उनकालाई कारवाही तोक्ने र सोही अनुसार हुने केसीले बताए ।