फाइल तस्बिर
बागलुङ, २० बैशाख– लघुजलविद्युत आयोजनाको नहर भत्किँदा बागलुङको निसीखोला गाउँपालिकाका १ हजार १ सय ५० घरधुरीमा विद्युत आपुर्ति बन्द भएको छ । शुक्रबार निसीखोलामा बर्षासँगै आएको बाढीले निसीखोला गाउँपालिका–४ मा रहेको निसीखोला दोस्रो लघुजलविद्युत आयोजनाको नहर भत्काएको हो । खोलामा रहेको बाँधसँगै नहरको केही भागसमेत खोलाले बगाएको छ । विद्युत अवरुद्ध भएपछि यस क्षेत्रमा संचालनमा आएका फर्निचर उद्योग, कुखुरापालक किसान तथा उद्योगि व्यवसायी मर्कामा परेका छन् ।
मोबाईल फोन चार्ज गर्ने विद्युतसमेत नभएकाले स्थानीय संचार सेवाबाट समेत बन्चित भएको गाउँपालिकाले जनाएको छ । आयोजनाको बाँध नजिकैको २५ मिटर नहर भत्किएको र भिरालो ठाउँ रहेकाले मर्मतका लागि समय लाग्ने आयोजनाका व्यवस्थापक रामप्रसाद चालिसेले बताए । बाढीले थप क्षति नपु¥याए एक महिना समय लगाएर मात्रै नहर मर्मत गर्न सकिने उनले बताए ।
यो क्षेत्रमा सञ्चालनमा रहेका लघुजलविद्युत आयोजनाहरु हरेक बर्ष बर्षाको समयमा प्रभावित हुने गरेका छन् । निसीखोला गाउँपालिकाका अधिकांश गाउँहरुमा लघुजलविद्युत आयोजनामार्फत विद्युतिकरण गरिएको छ । स्थानीय विद्युतलाई नै प्राथमिकतामा राखेर सबै घरमा बिजुली पु¥याउने काम भैरहेको गाउँपालिका अध्यक्ष तारानाथ पौडेल बताउँछन् । कम खर्चमा स्थानीयकै सक्रियतामा निर्माण भएका साना आयोजनाले हरेक बर्ष समस्या भोग्दै आएको उनको भनाई छ ।