गलकोटको हटिया बजारबाट पर्सा जानका लागि बस चढ्न लामवद्व मजदुरहरु । –फाइल तस्बिर
बागलुङ, ३० वैशाख– मंगलबार पर्सामा कोरोना पोजेटिभ देखिएकामध्ये १४ जना मजदुर बागलुङको गलकोट नगरपालिका–५ हटियाबाट फर्किएको तथ्य खुलेको छ । गलकोटमा भवन, सडक लगायतका क्षेत्रमा निर्माणको काम गर्दै आएका मजदुरहरु गत बैशाख ११ गते गलकोट हटिया बजारबाट पर्साका लागि हिँडेका थिए ।
काठमाडौ लगायत देशका ठुला शहरहरुबाट भटाभट मजदुरहरु फर्किएको खबर बोकेर कार्यपालिकाको कार्यालय आएका मजदुरहरुलाई बसको व्यवस्था गरेर गलकोट नगरपालिकाले गन्तव्यतर्फ पठाएको गलकोट नगरपालिकाका प्रमुख भरत शर्मा गैरेले बताए । उनीहरु गलकोटबाट ११ गते हिँडेको भएपनि पोखरामा साँझसम्म त्यहीँ रोकिएर बिभिन्न सिमानाकाहरु पार गर्दै १३ गते मात्रै पर्सा पुगेका थिए । स्थानीय तहबीच भएको सूचना प्रदानको आधारमा पर्सा पुगेका उनीहरुलाई क्वारेन्टाईनमा राखिएको छिमरामाई गाउँपालिका पर्साका अध्यक्ष मनोज कुमार गुप्ताले ढोरपाटनलाई बताए । उनीहरुसँगै गलकोटबाट रौतहट, बारा र पर्साका ८२ जना मजदुर दुईवटा बसमा हिँडेका थिए ।
गलकोटमा काम गर्ने ८५ मजदुरलाई नगरपालिकाले पठायो घर
