तनहुँ, २५ माघ –गर्भवती महिलालाई नियमित स्वास्थ्य परिक्षण गराउने बानी बसाल्दै सुरक्षित तवरले स्वास्थ्य संस्थामा सुत्केरी गराउन प्रेरित गर्ने उदेश्यले स्याङजाको हरिनास गाउँपालिकाले ‘उपाध्यक्षसँग सुत्केरी पोषण’ कार्यक्रम सञ्चालनमा ल्याएको छ । चालु आर्थिक बर्षको बजेट, निती तथा कार्यक्रममा उल्लेख भए अनुसार यो कार्यक्रम सञ्चालनमा ल्याइएको हो ।
गाउँपालिका उपाध्यक्ष झनमाया पराजुलीले क्याक्मी स्वास्थ्य चौकीबाट यो कार्यक्रमको शुभारम्भ गरिन् । दुई जना सुत्केरीलाई पोषणका लागि दुई हजार आठ सय रुपैयाँ हस्तानतरण गरिन् । कार्यक्रमले महिलाको स्वास्थ्य अवस्थामा सुधार र बालबालिकाको पोषणका लागी सघाउने उनले बताईन् ।
उपाध्यक्ष पराजुलीका अनुसार गत साउनयता गर्भवती अवस्थामा नियमित स्वास्थ्य परीक्षण गराएका र सरकारी स्वास्थ्य संस्थामा सुत्केरी भएकालाई मात्र दुई हजार आठ सय रुपैयाँ भत्ता दिईनेछ । यसका लागि चालु आर्थिक बर्षको बजेटमा तीन लाख रुपैयाँ बजेट विनियोजन गरिएको उनले जानकारी दिईन् । गत साउनयता गाउँपालिकामा कार्यक्रमले तोकेको मापदण्ड पुरा गरी २९ जना सुत्केरी भएका छन् । ती सबैलाई सम्बन्धित स्वास्थ्य संस्थाबाट उक्त रकम दिईने उनले बताईन् । बालबालिकालाई सुनौला हजार दिनसम्म लगाउनुपर्ने खोप लगाउनलाई पनि सचेत गराउने गरेको उनको भनाई छ ।
