पोखरा, १५ बैशाख – गण्डकी प्रदेशमा युवा तथा खेलकुद मन्त्री नियुक्त भएका स्वतन्त्र सांसद दीपक मनाङे भनिने राजिव गुरुङले सपथ ग्रहण गरेका छन् । मुख्यमन्त्री पृथ्वीसुब्बा गुरुङको उपस्थितिमा प्रदेश प्रमुख अमिक शेरचनले प्रदेश नीति तथा योजना आयोगको सभाहलमा सपथग्रहण गराएका हुन् । सपथ ग्रहणमा मनाङे निलो रंगको कोट र दौरा सुरुवालमा ठाँटिएका थिए । सपथग्रहण कार्यक्रममा सभामुख र अन्य दलका मुख्य नेताहरु भने उपस्थित भएनन् ।
सपथअघि उनले पत्रकारहरुसँग केहीबेर अनौपचारिक कुरा पनि गरे । मनाङेले छोटो प्रतिक्रिया दिँदै भने, ‘अहिले धेरै काम गर्नुपर्दैन । चार, पाँचओटा काम गरे पुग्छ । मसँग काम गर्ने टिम छ ।’ उनी यसअघि प्रदेश सभाको अर्थ तथा विकास समितिको सदस्य समेत थिए । तर समितिको काम चित्तबुझ्दो नभएको भन्दै राजीनामा दिएका थिए ।
मनाङ ‘ख’बाट स्वतन्त्र निर्वाचित सांसद मनाङे चुनाव जितेको झन्डै डेढ वर्षपछि मात्र सपथ खाएका थिए । मुख्यमन्त्री पृथ्वीसुब्बा गुरुङको अविश्वासको प्रस्ताव संसदमा टेबुल भएपछि जनमोर्चाले जसलाई समर्थन गर्छ, उसैलाई भोट दिने बताएका थिए । लामो सयम मोबाइल अफ गरेर बुधवार प्रदेशसभामा पनि उपस्थित नभएका उनले पछि मनाङका जनताले आफूलाई मुख्यमन्त्री विरुद्ध जान नदिएको बताएका थिए ।
