पोखरा / क्रिकेट मैदानमा निर्माणाधीन भीआईपी सेक्सन बजेट अपुग भएपछि बिचमै रोकिने भएको छ । पोखरा रंगशालास्थित क्रिकेट मैदानमा भ्याटसहित एक करोड ४६ लाखमा निर्माण सुरु भएको उक्त संरचना आधामै रोकिने निश्चित भएको हो ।

राष्ट्रिय खेलकुद परिषद् (राखेप) को गुरु योजना अनुसार निर्माण सुरु गरिएको भीआईपी सेक्सन सानो टुक्रा मात्र हो । पहिलो चरण अन्तरगर्त भीआईपी सेक्सन बनाउने योजना थियो । उक्त योजना अनुसार ग्राउन्ड फ्लोर मटिङ, फस्ट फ्लोर चेन्जिङ रुम लगायत संरचना बनाउने भएतापनि त्यहाँ ढलान गर्नु बाहेक अन्य काम भएको छैन् । उक्त योजना रोकिदाँ पोखराले आगामी २०२७ मा हुने आइसिसी महिला यु१९ विश्वकप समेत गुमाउने देखिएको छ ।

राखेपको योजना बिचमै रोकिदाँ पोखरालाई ठूलो घाटा लाग्ने गण्डकी प्रदेश क्रिकेट संघका अध्यक्ष सञ्जयकान्त सिग्देलले बताए । पोखरामा अन्तर्राष्ट्रिय स्तरको क्रिकेट रंगशालाको अभाव खट्किरहँदा बन्न लागेको संरचना नबन्दा दुःख लागेको उनले सुनाए ।

‘अहिले भीआपी सेक्सन बन्न लागेको छ । त्यो पनि पुरा हुने स्थिति छैन’ उनले भने, ‘आगमी वर्ष सम्झौता नभएका योजना कटौती गर्ने भन्ने कुरा छ । त्यस कारण पनि आगामी बजेटमा यो बन्ने छाटँ छैन ।’ सिग्देलका अनुसार राखेपको योजनामा कस्तो बन्ने र केके बन्ने भन्ने कुराको जानकारी समेत प्रदेश र जिल्लालाई छैन । नेपाल क्रिकेट संघ (क्यान) यु१९ विश्वकपका लागि मिसन २०२७ लिएर सात वटै प्रदेशमा जाँदै छ ।

क्यानले प्रतियोगिता कहाँ गराउने भन्ने योजना बुनिरहँदा त्यसमा पोखराको पनि नाम जोडिएको छ । पोखरामा विश्वकप गराउन क्रिकेट आवद्ध संघहरु लागिरहेपनि पूर्वाधारमा चुक्नु परेको छ । पोखरालाई अन्तर्राष्ट्रिय जगतमा चिनाउने अवसर खेर जाने निश्चित छ ।

‘आगामी २०२७ को यु१९ विश्वकप महिला क्रिकेटका लागि हामीले पनि पहल गरिरहेका छौं । तर, संरचना अभावले हामीले गुमाउने निश्चित जस्तै भएको छ ।’ पोखराको क्रिकेट पिच उत्कृष्ट पिच मध्येको एक हो तर, संरचना नहुँदा ठूला प्रतियोगिता गुमाउँदै आइरहेको छ ।

पोखराको क्रिकेट रंगशाला राखेपबाट उपेक्षित हुँदै आइरहेको छ । यस अघि समेत पोखरा क्रिकेट मैदानका लागि राखेपले बजेट दिने गरेको छैन् । यद्यपी गुरु योजना अघि सारेपनि त्यसलाई पूर्णता दिन भने दशकौं कुर्नुपर्ने स्थिति देखा परेको छ । पोखरा क्रिकेट मैदानमा पिच बाहेक अन्य संरचना केहि छैन । यदि भीआईपी सेक्सन बनेको खण्डमा यहाँ अन्तर्राष्ट्रिय प्रतियोगिता संचालन गर्न योग्य हुनेछ । भीआईपी सेक्सनमा खेलाडी चेन्जीङ रुम, भीआईपी कक्ष, अम्पाएर कक्ष, मिडिया सेन्टर लगायतको संरचना हुनेछन् ।

यसका लागि प्रदेश र स्थानीय तहले सोच्नुपर्ने सिग्देल सुनाउँछन । सिग्देलका अनुसार भरतपुर महानगरले २०२७ को विश्वकप गराउने योजना बनाइरहेको छ । योजनाका लागि मेयर नै अग्रसर भएपनि गण्डकीमा त्यसो नभएको भनाई राख्छन ।

‘हामीलाई अरु केहि पनि चाहिएको छैन । मात्र पिन्थ लेबल, प्लेयर बक्स, अम्पाएर, भीआईपी र मिडिया सेन्टर भए पुग्छ । यसका लागि स्थानीय तहले पनि पहल गर्न सक्छ भन्ने कुरा भरतपुरले देखाएको छ’ उनले सुनाए, ‘पोखराको ग्राउन्ड राम्रो हुँदाहुँदै पनि हामीले केहि गर्न सक्ने स्थिति छैन । समय छ यसका लागि प्रदेश र महानगरले कदम चालोस भन्ने हाम्रो आशा हो ।’

हाल निर्माण हुन लागेको भीआईपी सेक्नको टेन्डर गत २४ जेठमा अटुट इन्जिनियरिङ काठमाडौंले प्राप्त गरेको हो । एक करोड ४६ लाख रुपैयाँ सम्झौता अनुसार सुरुवातमा पिलर हाल्नेसम्मका काम भएपनि हाल पहिलो तलासम्मका लािग ढलान गर्ने काम भइरहेको छ ।

एक इन्जिनियरका अनुसार त्यहाँ खेलाडीका लागि मात्रै संरचना बन्नेछ । ‘यो खेलाडीको पोर्सनमात्र हो । यहाँ खेलाडीका लागि भिआईपी सेक्सन क्रिकेट मास्टर प्लान अनुसार बनिरहेको छ । खेलाडी चेन्जिङ रुम भएकाले अन्य बन्दै पहिलो तला ढलान गरेर सक्ने योजनामा हामी रहेका छौं ।’ उनले भने । उक्त भीआईपी सेक्सन सम्पन्न गर्न करिब एक करोड ७६ लाख रुपैयाँ लाग्ने ती इन्जिनियरले बताए ।

हाल बन्न लागेको भीआईपी सेक्सनमा टफमा मिडिया सेन्टर रहनेछ । यस्तै दुई भागमा खेलाडीहरुका लागि चेन्जिङ रुम र बिचमा भीआईपीका लागि बस्न मिल्ने संरचना रहनेछ । त्यतिमात्र होइन गण्डकी प्रदेशले आफ्नै अन्तर्राष्ट्रिय स्तरको क्रिकेट मैदान बनाउका लागि जग्गा खोजी गरिरहेको छ । गण्डकीले डिपीआर तयार गरिसकेपनि जग्गा अभावमा मैदान बनाउ सकिरहेको छैन ।