पोखरा/इनोभेटिभ नेपाल ग्रुप (आइएनजी) ले पोखरामा ‘क’ श्रेणीको सूचना तथा प्रविधि (आइटी) कलेज सञ्चालन गर्ने भएको छ । पोखरा १७ मुस्ताङचोकमा स्नातक तहको आइटी पढाउने नयाँ कलेजको स्थापना हुन लागेको हो । फिस्टेल माउन्टेन कलेज खुलेसँगै अब पोखरामा बेलायतको स्वर्ण शिक्षाको अध्यापन गराइने छ ।
युकेमाजस्तै सिकाइ शैलीको साथ पूर्ण रूपमा मान्यता प्राप्त युके डिग्री पोखरामै प्रदान गर्ने उदेश्यका साथ कलेजको स्थापना गरेको सञ्चालक सुलभ बुढाथोकीले जानकारी दिए । पोखरालाई पर्यटनको मात्रै नभइ आइटीको हब बनाउँदै स्वदेशमै बसेर विदेशी कम्पनीका लागि काम गर्न सकिने वातावरण सिर्जना गर्नु नै मुख्य उद्देश्य रहेको उनले बताए । अहिले नेपालमा आइटीमा दक्ष जनशक्तिको अभाव खड्किएको कारण कलेज स्थापना गरिएको उनले जानकारी दिए । ३ वर्षे कोर्षमा मास्टर आर्टिफिसियल इन्टेलिजेन्स (एआई) तथा मेसिन सिकाइ, बिग डाटा र क्लाउड कम्प्युटिङ सिकाइने छ ।
युकेको वोल्भरह्याम्प्टन विश्वविद्यालयसँगको साझेदारीमा कलेज स्थापना गरिएको बुढाथोकीले सुनाए । विद्यार्थीलाई सिकाइ सँगै रोजगारमा समेत जोड्न सकिने र अबको युग प्रविधिको युग भएकाले आइटी कलेज आवश्यक रहेको उनको भनाइ छ ।
स्नातक तहमा पहिलो वर्ष लेभल ४ को अध्यापन गराइनेछ । दोस्रो वर्ष लेभल ५ र तेस्रो लेभल ६ को पढाइ हुनेछ । यसबाट विद्यार्थीले एआई इन्जिनियरिङ, मेसिन विज्ञ, एम्बेडेड सिस्टम डेभलपर, मोबाइल एप÷ वेब डेभलपर, जटिल सिस्टम इन्जिनियर, सिस्टम विश्लेषक र सफ्टवेयर आर्किटेक्ट बन्न सक्ने बुढाथोकीको भनाइ छ । कोर्षका लागि प्रति कोर्ष करिब ८ लाख रुपैयाँ लाग्नेछ ।
