बागलुङ/बडिगाड गाउँपालिकाका स्वास्थ्य स्वयंसेविकाहरुले रसुवाको भोटेकोशी बाढी पीडितको उद्वार र राहतका लागि १ लाख बढी सहयोग गरेका छन् ।
बडिगाडका १ सय ३ जना महिला सामुदायिक स्वास्थ्य स्वयंसेविकाहरुले बाढी पीडितका लागि राहतस्वरुप १ लाख १ सय ११ रुपियाँ प्रधानमन्त्री दैवी प्रकोप उद्वार कोषमा जम्मा गरेको गाउँपालिका अध्यक्ष गण्डकी थापा अधिकारीले जानकारी दिइन् ।
‘‘डाक्टरविहिन दुर्गम गाउँमा बसेर खासगरी महिला तथा बालबालिकाको क्षेत्रमा महत्वपूर्ण काम गर्दै आउनुभएका स्वास्थ्य स्वयंसेविकाहरुले देशले भोगिरहेको विपत्तिमा साथ दिएर मानवीय सद्भाव कायम गर्नुभएको छ’’ अध्यक्ष थापाले भनिन् ।
नेपालको स्वास्थ्य क्षेत्रको मेरुदण्ड मानिने महिला स्वास्थ्य स्वयंसेविकाहरूले आफूले काम गरिरहेको समुदाय र देशकै स्वास्थ्य प्रणालीलाई जोड्ने पुलको काम गरिरहेका छन् ।
