बागलुङ, १६ बैशाख – बागलुङ नगरपालिकाले जिल्लामा भित्रिने सवै सवारी साधनलाई मंगलवारदेखि डिस्इन्फेक्सन गर्न सुरु गरेको छ । जिल्ला भित्रिने मुख्य नाका मालढुंगा भएर आउने सवै सवारी साधनलाई मंगलवारदेखि ‘डिस्इन्फेक्सन’ गर्न सुरु गरिएको नगरपालिकाले जनाएको छ । बागलुङ नगरपालिकाको स्वास्थ्य शाखाले आफ्नै खर्चमा ‘डिस्इन्फेक्सन स्प्रे’ निर्माण गरि जिल्ला भित्रिने सवै सवारी साधनलाई भाइरस संक्रमण रहित बनाउन थालिएको स्वास्थ्य शाखाका प्रमुख राम प्रसाद खनालले वताए ।
बागलुङमा भित्रिने सवै सवारी साधनहरुलाई स्प्रे मार्फत मालढुंगामा भाइरस संक्रमण रहित गराएर मात्रै जिल्ला प्रवेशको ब्यवस्था गरिएको हो । बागलुङ नगरपालिकाको व्यवस्थापनमा जिल्ला प्रहरी कार्यालयको सहयोगमा डिस्इन्फेक्सन गर्न सुरु गरिएको नगरप्रमुखको सचिवालयका कर्मचारी ऋषिराम शर्माले वताए । बागलुङ बाहिरबाट कोभिड–१९ को संक्रमण भित्रिन नसकोस् भनेर समाजिक उत्तरदायित्व अन्तरगत यस्तो काम गरिएको उनले वताए । सवारी साधनबाट पनि कोरोना भित्रिने खतरा रहेकाले त्यसको रोकथामको लागि स्प्रे निर्माण गरिएको हो । डिस्इन्फेक्सनका लागि तयार गरिएको स्प्रे २० हजार रुपैयाँको लागतमा निर्माण गरिएको हो ।