बागलुङ, ३० वैशाख– कोरोना भाइरसविरुद्वको लडाईंमा सहयोग पुगोस् भन्ने उदेश्यले प्रोग्रेसिभ इन्जिनियरिङ एशोसिएसन नेपाल (पिईएएन) बागलुङमा आवद्व ईन्जिनियरहरुको पहलमा बागलुङ नगरपालिकाको परिसरमा निर्माण गरिएको निसंक्रमण धारा (फुट अपरेटिङ ह्याण्ड वासिङ टुल) हस्तान्तरण गरिएको छ । कोरोना संक्रमणको जोखिम न्युनिकरण गर्ने उदेश्यले निर्माण गरिएको निसंक्रमण धाराको बागलुङ नगरपालिकाका प्रमुख जनक पौडेलले मंगलबार उद्घाटन गरेका छन् ।
नगरपालिकालाई हस्तान्तरण गरिएको निसंक्रमण धाराले कोरोना संक्रमण रोकथाममा महत्वपूर्ण भूमिका खेल्ने अपेक्षा गरिएको नगर प्रमुख पौडेलले उद्घाटनपछि प्रक्रिया दिए । नगर प्रमुख पौडेलले उपकरण बनाउन भूमिका खेल्ने सबैलाई धन्यबादसमेत व्यक्त गरे ।
पिईएएन बागलुङले यसअघि खुट्टाले थिच्दा साबुन र पानी आउने निसंक्रमण धारा निर्माण गरि जिल्ला प्रहरी कार्यालय र धौलागिरि अंचल अस्पताल बागलुङलाई हस्तान्तरण गरिसकेको छ । हस्तान्तरण कार्यक्रममा ईन्जिनियर गौरब शर्माले उक्त प्रविधिको विषयमा जानकारी गराउँदै कोरोनाको जोखिम बढ्दै गइरहेका बेला जनताको चाप हुने स्थानीय तहमा निर्माण गरिएका यस्ता धारो निकै उपयोगी हुने बताए ।
