बागलुङ, २४ भदौ– भारत सरकारबाट निवृत्तीभरण पाउनेलाई पनि समाजिक सुरक्षा भत्ता दिनुपर्ने भन्दै नेपाल कम्युनिष्ट पार्टी (नेकपा) जैमिनी नगर कमिटिले नगरपालिकालाई ज्ञापनपत्र बुझाएको छ ।
नगरपालिकाले सामाजिक सुरक्षा भत्ता पाउनेहरुलाई समयमै नदिएको र भारतीय निवृत्तिभरण पाउनेहरुको सुविधा बिना कारण काटेको भन्दै नेकपाले विरोध जनाएको छ ।
बुधबार पार्टी नगर कमिटि अध्यक्ष इन्द्र थापाको संयोजकत्वमा नगरपालिका पुगेको टोलीले नगरप्रमुख इन्द्रराज पौडेललाई ज्ञापनपत्र बुझाएको हो । जिल्लाका अन्य स्थानीय तहले समयमै सामाजिक सुरक्षा भत्ता वितरण गरेको भन्दै नेकपाले जैमिनीले मात्रै भारतीय निवृत्तिभरणको भत्ता कटौती गर्नुपर्ने कारण नरहेको उल्लेख गरेको छ ।
चौमासिक रुपमा वितरण हुने भत्ता निकासा हुँदासमेत लामो समय रोक्ने र बैंकमार्फत गत आर्थिक वर्षको साउनमै उपलव्ध भैसक्नुपर्ने भत्ता अहिलेसम्म नबाँडेको भन्दै नेकपाले तत्काल भत्ता वितरणमा जोड दिईएको छ ।
नेपाल सरकारले दोहोरो सुविधा कटौती गर्न चैतमा सामाजिक सुरक्षा ऐनमा परिवर्तन गरेको परिपत्र पाएपछि दोहोरो सुविधा पाउनेहरुको सामाजिक सुरक्षा भत्ता कटौती भएको नगरप्रमुख इन्द्रराज पौडेलले बताए । जैमिनी नगरपालिका वडा नं. ४ का बासीले भदौको अन्तिम सातासम्म पनि सामाजिक सुरक्षा पाएका छैनन् ।
