बागलुङ/ स्थानीय मदिरा बनाउने क्रममा आगो फैलिएर अनियन्त्रित भएपछि बागलुङको ताराखोला गाउँपालिका–२ अर्गलमा घरगोठ जलेर नष्ट भएको । आगलागीबाट अर्गलको किकल्टाका विर बहादुर घर्तीका घरगोठ जलेको हो ।
मदिरा बनाईरहेको ठाउँबाट सल्केको आगो घरमा फैलिएपछि परिवारले भागेर ज्यान जोगाएका थिए । घर्तीको घरगोठ जलेर पूर्णरुपमा नष्ट भएको प्रहरीले जनाएको छ । उनको गोठमा बाँधिएको भैंसी आगोले जलेर मरेको घर्तीले बताए । घरमा राखिएको अन्नपात, लत्ताकपडा सबै जलेपछि घर्ती परिवार बिचल्लीमा परेको छ ।
आगलागीका कारण घरमा रहेको ४५ हजार नगद, २ तोला सुन, टिभी, १६ मुरी मकै, धान, चामल, भट्ट, कपडा भाँडाकुडालगाएका सामग्री जलेको घर्तीले बताए । घरगोठ जल्दा घर्तीको २५ लाख बराबर धनमाल नष्ट भएको स्थानीय गोविन्द बहादुर घर्तीले बताए । एउटै घरमा भुँईतलामा गोठ र माथिल्लो तलामा बसोबास गर्दै आएको घर्ती परिवार बिचल्लीमा परेको छ । छिमेकीको घरमा उनको परिवारलाई राखिएको गोविन्दले बताए ।
