पोखरा/ जातीय विभेदको आरोपमा फरार रहेको वडासदस्य पक्राउ परेका छन । प्रहरीले आइतबार कास्कीको माछापुच्छ«े गाउँपालिका ५ रिभानका वडा सदस्य रामजी लामिछानेलाई पक्रिएको हो । उनीविरुद्ध पोखरा २९ भण्डारढिकका नारायण परियारले जातीय विभेद गरेको आरोपमा उजुरी दिएका थिए । गत चैत ७ गते परियारले दिएको उजुरीमा वडासदस्य लामिछानेसहित सुजन लमिछाने, सरिता लामिछाने र सन्तोष परियारले आफूमाथि विभेद गरेको आरोप लगाएका थिए ।
उजुरीपछि फरार सन्तोष परियार र सुजन लामिछाने चैत १२ गते पक्राउ परेका थिए । वडा सदस्य लामिछाने र सरिता लामिछानेलाई आइतबार पक्राउ गरिएको कास्की प्रहरी प्रवक्ता डिएसपी श्रवणकुमार विकले जानकारी दिए ।
पीडित परियारमाथि उनीहरुले गत फागुन २५ गते विभेद गरेका थिए । परियार आफन्तको घरमा व्रतवन्धको निम्ता मान्न जाँदा भान्सा छोइदिएको भन्दै वडा सदस्य लामिछानेले सबै खाना भुइँमा फालिदिएका थिए । खाना फाल्नेमात्र नभई परियारलाई छुट्टै भान्सा बनाइएको थियो । परियारले जातीय तथा अन्य छुवाछुत र भेदभाव (कसूर र सजाय) ऐन २०६८ अनुसार कारवाहीको माग गर्दै उजुरी दिएका थिए ।
