पोखरा/जेनजीको आन्दोलनमा तहस नहस भएको पोखरामा गण्डकी प्रदेशका सामाजिक मन्त्री विन्दुकुमार थापाको निजी घर तथा व्यवसाय पनि जलाइयो । पोखराको नयाँबजारमा उनको घरसँगै भाइको घर पनि जलाइयो भने लेकसाइडमा रहेको होटल र व्यवसायिक प्रतिष्ठान पनि जलाइयो । जेनजीले लगाएको आगोमा परी दुईजना महिलाको मृत्यु भयो । उनै थापाको परिवारमाथि अहिले अर्को हमला भएको छ । मन्त्री थापाका छोरा सौगात थापाको नाममा फेक आइडी बनाइ रकम ठगी गर्न थालिएको छ । आफू अहिले समस्यामा परेको र सहयोग गर्न भन्दै सौगात थापाको नामबाट ठगहरुले रकम माग्ने गरेका छन् ।

विन्दुकुमार थापाका भाइ धु्रव थापाले आफूहरुको नामबाट ठगी भएको बताएका छन् । उनले सामाजिक सञ्जाल फेसबुकमा लेख्दै त्यस्तो किसिमको सहयोग माग्न लागेमा तत्कालै प्रहरीलाई खबर गर्न आग्रह गरे । उनले लेखेका छन, ‘वर्तमान पीडाको समयमा पनि केही असामाजिक व्यक्तिहरुले हाम्रो परिवारलाई थप पीडा दिन खोजेको भेटिएको छ । हाम्रो परिवारका सदस्यहरुको नाममा फेक आइडीहरु बनाएर केही व्यक्तिहरुले सहयोग रकम माग गर्दै ठगीधन्दा चलाइरहेको पाइएको छ । जानकारीमा आएका केही त्यस्ता व्यक्तिहरुलाई प्रहरीले पक्राउ गरी कारवाहीको प्रक्रियासमेत अघि बढाइसकेको छ । यस अवस्थामा हाम्रो तथा हाम्रो परिवारको कसैको पनि नामबाट कुनैपनि माध्यमद्धारा कसैले पनि सहयोग रकम मागेको पाइएमा तत्काल हामीलाई वा प्रहरीलाई जानकारी गराइ सहयोग गरिदिनुहुन हार्दिक अपिल गर्दछौं ।’

घर र रिसोर्ट जलाइएको भोलिपल्टै मन्त्री थापाका छोरा सौगात थापाको नाममा नक्कली फेसबुक आईडी बनाइएको थियो । त्यसमार्फत् आफू ठूलो समस्यामा परेको भन्दै विभिन्न व्यक्तिहरूसँग रकम मागियो । पोखरा उद्योग वाणिज्य संघकी महासचिव शोभा गौतमले उक्त आईडीमार्फत् एक लाख रुपैयाँ मागिएको भन्दै फेसबुकमै जानकारी गराएकी छन् । त्यसपछि अरु धेरै व्यक्तिहरूले पनि त्यस्तै किसिमले रकम मागिएको विषय सार्वजनिक गरेका थिए ।

यसै क्रममा पोखरा ट्रेड मलमा व्यवसाय गर्नेहरुसँग पनि नक्कली आईडीमार्फत् रकम असुल्ने प्रयास भयो । एक व्यापारीलाई नगदमै रकम लिन बोलाइएपछि उनले प्रहरीलाई खबर गरे । त्यसै क्रममा प्रहरीले नगद लिन पुगेका ४ जनालाई पक्राउ ग¥यो ।पक्राउ पर्नेमा लमजुङ मध्यनेपाल–८ का २८ वर्षीय विवेक गुरुङ, पोखरा–२९ का २७ वर्षका बुद्ध गुरुङ, पोखरा–५ का ३७ वर्षीय मीनराज तामाङ र पोखरा–१७ का ४० वर्षीय दीपक ढकाल रहेका छन् ।

प्रहरीका अनुसार उनीहरूसँग लुटपाटमा प्रयोग हुने धारिलो हतियारसमेत भेटिएको छ । विवेक गुरुङको साथबाट विभिन्न दरका १ लाख २२ हजार रुपैयाँ र दापसहितको धारिलो तरबार बरामद गरिएको छ भने बुद्ध गुरुङको साथबाट फलामको स्टिक बरामद गरिएको छ । उनीहरूले नक्कली आईडीमार्फत्मात्र नभइ अन्य स्थानमा हातहतियार देखाएर रकम असुली गरेको सूचना प्रहरीलाई प्राप्त भएको जिल्ला प्रहरी कार्यालय कास्कीका सूचना अधिकारी एवं डिएसपी हरिबहादुर बस्नेतले बताए ।