पोखरा/ जेन जी आन्दोलनका क्रममा गत भदौ २४ गते कास्की कारागारबाट फरार ८१ जना कैदी तथा थुनुवा पक्राउ परेका छन् । कास्की प्रहरी र मातहतका निकायबाट खोजतलास गर्ने क्रममा पक्राउ परेका उनीहरुलाई कारागारमा बुझाइएको प्रहरीले जनाएको छ ।
अन्य फरार कैदीबन्दीको खोजतलास भइरहेको कास्की प्रहरीका सूचना अधिकारी डिएसपी हरिबहादुर बस्नेतले बताएका छन् । उनका अनुसार फरार कैदी तथा थुनुवालाई असोज २० गतेभित्र स्वस्फुर्त रुपमा कारागार फर्किन अपिल गरिएको थियो । तर नआएपछि प्रहरीले खोजतलास अभियान थालेको थियो ।
पक्राउ परेकाहरुमा जवरजस्ती करणी मुद्धाका १६ जना, लागु औषध मुद्धाका १६, चोरी मुद्धाका २५, कर्तव्य ज्यान मुद्धाका ८, ज्यान मार्ने उद्योगका ९, अभद्र व्यवहार मुद्धाका ४, सवारी अंगभंग, कुटपीटबाट अंगभंग र मानव बेचविखन मुद्धाका एकएकजना रहेका प्रहरीले जनाएको छ ।
