पोखरा/गण्डकी प्रदेश प्रशिक्षण प्रतिष्ठानले गएको भदौ १८ गते सुरु गरेको प्रदेश र स्थानीय तहमा अधिकृतस्तर सातौँ र आठौँ तहमा कार्यरत कर्मचारीहरुको ३० दिने कार्यदिने सेवाकालीन तालिम सकिएको छ ।
कुल १ सय २० सत्रमा संचालित तालिममा ४६ जना प्रशिक्षकहरुले सहजीकरण गरेका थिए भने प्रदेश र स्थानीय तहमा कार्यरत ३० जना कर्मचारीहरुको सहभागीता रहेको थियो ।
गण्डकी प्रदेश निजामती ऐन र नियमावलीमा नै कर्मचारीको क्षमता अभिवृद्धिको लागि तीन वर्षमा कम्तीमा पाँच वा सोभन्दा बढी दिनको क्षमता अभिवृद्धि तालिमको व्यवस्था गर्नुपर्ने उल्लेख गरेको छ ।
गण्डकी प्रदेश प्रशिक्षण प्रतिष्ठानले प्रदेश लोकसेवा आयोगबाट प्रदेश र स्थानीय तहमा सिफारीस भएका कर्मचारीहरुको लागि सेवा प्रवेश तालिम र सेवामा कार्यरत कर्मचारीहरुका लागी सेवाकालीन तालिम २०७६ देखि संचालन गर्दै आएको छ ।
तालिम अवधिभर प्रतिष्ठानका कर्मचारी उपसचिव प्रभाकर घिमिरे र प्रशिक्षण तथा अनुसन्धान अधिकृत ई. मनोज पौडेलले तालिम व्यवस्थापन तथा संयोजनको जिम्मेवारी निर्वाह गरेका थिए ।
तालिम समापन प्रतिष्ठानको कार्यकारी निर्देशक सुरेन्द्रबाबु तिवारीको अध्यक्षता एव गण्डकी प्रदेश सरकारका प्रमुख सचिव डन्डुराज घिमिरेको प्रमुख आतिथ्यतामा सम्पन्न भएको थियो ।
समापन सत्रमा बोल्दै प्रमुख सचिव घिमिरेले कर्मचारीले प्राप्त गरेको अवसरले सेवा प्रवाहमा सुधारमा आएमा मात्र तालिम सफल बन्ने धारणा राखे ।
प्रतिष्ठानका कार्यकारी निर्देशक सुरेन्द्रबाबु तिवारीले तालिमको संक्षेपीकरण प्रस्तुत गरेका थिए भने तालिमका सहभागी कर्मचारी डा. कमल अधिकारी र कल्पना सापकोटाले सहभागीको तर्फबाट मन्तब्य व्यक्त गरेका थिए । प्रतिष्ठानका निर्देशक लक्ष्मण तिमिल्सिनाले संचालन गरेको कार्यक्रममा सहभागी कर्मचारीको तालिमको नतीजा सार्वजनिक गरी श्रेणी उल्लेख गरी प्रमाणपत्र वितरण गरिएको थियो ।
