म्याग्दी/जिल्ला प्रशासन कार्यालय म्याग्दीले आमाको नामबाट पहिलोपटक नागरिकता प्रदान गरेको छ । बाबुको पहिचान नखुलेकाको अवस्थामा नागरिकताबाट बन्चित रहेकी म्याग्दीको मालिका गाउँपालिका–५,देविस्थानकी २२ वर्षीया सीमा पुनलाई प्रमुख जिल्ला अधिकारी रविन्द्र आचार्यले सोमबार वंशजका आधारमा नागरिकता प्रदान गरेका हुन् ।
नागरिकता ऐन,२०६३ को दोस्रो संशोधन तथा नियमावलीको चौथो संशोधन बमोजिम पुनलाई ५६ वर्षीया आमा निलसरा पुनको नामबाट नागरिकता प्रदान गरिएको सहायक प्रजिअ कुलप्रसाद आचार्यले बताए ।
नेपाल नागरिकता (चौथो संशोधन) नियमावली,२०८२ राजपत्रमा प्रकाशन गरेसँगै नागरिकता ऐन २०६३ को व्यवस्था कार्यान्वयन गरिएको छ । नागरिकता प्राप्त गरेपछि पुनले आफ्ना रोकिएका कार्यहरू अगाडी बढ्ने बताइन् ।
‘नागरिकताले अब मेरो परिचय खुलेको छ, आमाको नामबाट नागरिता पाउँदा निकै उत्साहित छु,’ पुनले भनिन् । छोरीको हातमा नागरिकता परेपछि आमा निलसराले आफ्नो महत्वपूर्ण जिम्मेबारी पूरा भएको बताइन् ।
प्रमुख जिल्ला अधिकारी आर्चायले संविधान तथा प्रचलित कानूनअनुसार नागरिकका हकअधिकार सुनिश्चित भएको बताए । जन्मदिने बुबाको परिचय नभएको अवस्थामा आमाको नामबाट नागरिकता लिन आवश्यक प्रक्रियाका बारेमा स्थानीयमा समेत परिपत्र पुगिेको छ । बाबुको पहिचान नखुलेकाको अवस्थामा म्याग्दीमा विगतका वर्षमा प्रष्ट कानूनी आधार नहुँदा नागरिकताबाट बन्चित भएकालाई सहज भएको छ । जिल्ला प्रशासन कार्यालयमा हालसम्म तीनजना किशोरीले आमाको नामबाट नागरिकता लिन आवश्यक कागजातहरु प्रक्रियामा रहेको छ ।
