म्याग्दी/उत्तरी म्याग्दीको अन्नपूर्ण गाउँपालिका ३ दानाका २४ वर्षिय सौरव वि.क.को हत्या गरेको आरोपमा २२ वर्षिय प्रकाश बिकलाई प्रहरीले पक्राउ गरेको छ ।
२०८२ फागुन ७ गते सौरब विकको गैयाभाट जंगलमा घाँस काट्ने क्रममा लडेर मृत्यु भएको भनिएको घटनामा मृत्यु नभई हत्या भएको भन्दै प्रकाशलाई पक्राउ गरिएको हो ।
मृतक सौरवको पोष्टमार्टम रिपोर्ट आएपछि हत्या भएको पुष्टी भएपछि अनुसन्धान गरी प्रकाशलाई पक्राउ गरिएको जिल्ला प्रहरी कार्यालय म्याग्दीका सूचना अधिकारी सागर तिमिल्सिनाले बताए । मृतक विकसँगै जंगलमा भेडाको उन काट्न, गोठ सार्न गएका प्रकाशले पछाडीबाट टाउकोमा दाउराले प्रहार गरी हत्या गरेको अनुसन्धानबाट खुलेको प्रहरीले जनाएको छ ।
पोष्टमार्टम रिपोर्टमा टाउको र पछाडीबाट प्रहार गरेको आएपछि घटनाको अनुसन्धानको क्रममा आरोपीको बयानले हत्या गरेको स्वीकार गरेको सुचना अधिकारी सागर तिमिल्सिनाले बताए । आरोपी र मृतकबीच पारिवारिक सम्बन्धका कारणले घटनाको वास्तविकता लुकाउने प्रयास भएको बुझीएको छ ।
घटनास्थल, पोष्टमार्टम रिर्पोट र आरोपितको बयान मेल खाने प्रमाणका आधारमा हत्यामा संलग्न बिकमाथि कर्तव्य ज्यान मुद्दामा अनुसन्धान अघि बढाइएको सुचना अधिकारी तिमिल्सिनाले बताए । मृतकको पोष्टमार्टम रिर्पोट अगाडी पीडित र पिडक पक्षबाट प्रमाणहरू लुकाउने प्रयासहरू भएकाले एक महिनापछि मात्रै आइतबार जिल्ला अदालत म्याग्दीबाट ७ दिनको म्याद थप गरी अनुसन्धान अगाडी बढाईएको जिल्ला प्रहरी कार्यालय म्याग्दीले जनाएको छ ।
