बागलुङ/विद्यामन्दिर माध्यमिक विद्यालयमा कक्षा १२ का विद्यार्थीले नवआगन्तुक कक्षा ११ का विद्यार्थीलाई स्वागत गरेका छन् । एसईई परीक्षा उत्तिर्णपछि कक्षा ११ मा अध्ययन गर्न आउने विद्यार्थीलाई उच्च शिक्षाको माहोलबारे कार्यक्रममा जानकारी गराइएको थियो ।
विद्यामन्दिर माविमा कक्षा ११ र १२ तर्फ शिक्षा, मानविकी, विज्ञान र व्यवस्थापन संकायको पढाइ हुन्छ । सदरमुकामका विभिन्न विद्यालयसहित ग्रामीण क्षेत्रबाट पनि आएकाहरुलाई स्वागत गरेर विद्यालयप्रति सकारात्मक बनाउने, सिकाई अभ्यासमा लाग्न प्रेरित गर्ने र माथिल्लो तहका विद्यार्थी माझ घुलमिल भइ आफ्ना अप्ठ्याराहरु हटाउने कामका लागि यो कार्यक्रम गरिएको विद्यार्थीहरुले बताए ।
कक्षा १२ व्यवस्थापन समूहकी इशानी पुनको अध्यक्षता, कृष्ण बिक र मेलिना पाण्डेको संचालनमा कार्यक्रम सम्पन्न भएको थियो ।
कार्यक्रममा बागलुङ नगर शिक्षा अधिकारी धनप्रसाद पोखरेलले रमाएर पढ्ने वातावरणले विद्यार्थीमा गुणस्तर बढ्ने, विद्यालयप्रति विश्वास जाग्ने भन्दै विद्यालयले पनि उचित वातावरण प्रदान गर्नुपर्ने बताए ।
कार्यक्रममा बागलुङ नगरपालिका–३ का वडा अध्यक्ष सनि केसी लक्ष्मण, विद्यालय व्यवस्थापन समितिका अध्यक्ष श्रीजय श्रेष्ठ र प्रधानाध्यापक छविरमण रेग्मी, सहायक प्रअ मुकुन्द प्रसाद शर्मा लगायतले शुभकामना मन्तव्य राखेका थिए ।
कार्यक्रममा कलाकार शान्ता रानी परियारले गीत संगीतबाट मनोरञ्जन गराएकी थिइन् । कार्यक्रममा सयौं विद्यार्थीको सहभागिता थियो । विद्यामन्दिर माविमा कक्षा १ देखि १२ सम्म १ हजार ४ सय बढी विद्यार्थी अध्ययनरत छन् ।
