पोखरा/ट्रेकिङका लागि प्रख्यात रहेको अन्नपूर्ण आधारशिविर बाट करिब २ घण्टा अघि मात्रै स्वास्थ्य केन्द्र छ ।

पोखरा ÷ तीन वर्षअघि अन्नपूर्ण आधार शिविरमा एक सुरक्षाकर्मीको मृत्यु भयो । संयुक्त राष्ट्रसङ्घका महासचिव एन्टोनियो गुटेरेसको सुरक्षार्थ अन्नपूर्ण आधार शिविरमा खटिएका प्रहरी सहायक निरीक्षक टीकाराम ढुङ्गानाको लेक लागेर मुत्यु भयो । वि.सं.२०८० कार्तिकमा नेपाल भ्रमणमा रहेका राष्ट्रसंघीय महासचिव गुटरेसको सुरक्षामा खटिएका सुरक्षाकर्मीको मृत्युले अन्नपूर्ण आधार शिविरहमा प्राथमिक उपचारको व्यवस्था समेत नभएको विषयलाई प्रष्ट देखाइदियो ।

पर्यटकीय पदमार्ग समेत रहेको अन्नपूर्ण आधार शिविर पर्यटकहरुको रोजाइको केन्द्रमा पर्दछ । ट्रेकिङका लागि प्रख्यात रहेको अन्नपूर्ण आधारशिविर बाट करिब २ घण्टा अघि मात्रै स्वास्थ्य केन्द्र छ । अन्नपूर्ण गाउँपालिका वडा नम्बर ११ छोमरुङमा स्वस्थ्य केन्द्र रहेको छ । त्यो भन्दामाथि कुनै प्राथमिक उपचार समेत हुँदैन् ।

त्यहि कारण लेक लागेर ढुंगानाको मृत्यु भएको हो । स्वास्थ्यमा समस्या आएपछि तत्काल हेलिकप्टरमार्फत पोखरा ल्याएपनि उनको ज्यान जोगिएन । त्यहि घटनाले अन्नपूर्ण गाउँपालिकाको ध्यान त्यसतर्फ तान्यो । त्यसको तीन वर्ष पछि माछापुच्छ्रे आधार शिविरमा प्राथमिक उपचार केन्द्र स्थापना गरिएको छ ।

पालिकाको दश लाख रुपैयाँ र स्थानिय पर्यटन व्यवसायिको पाँच लाख गरि १५ लाख रुपैयाँमा खेलिधुस्थित एमबिसीमा प्राथमिक उपचार केन्द्र स्थापना गरिएको हो । पदयात्रामा जाने तथा अन्नपूर्ण वेश क्याम्प पुग्ने पर्यटकको स्वास्थ्यका लागि यसले ठूलो अर्थ राख्ने अन्नपूर्ण गाउँपालिका वडा नम्बर २ का वडाध्यक्ष पिताम्बर भण्डारीले जानकारी दिए ।

‘विशेषगरि गुटरेसको एबिसी भ्रमणको क्रममा त्यहाँ खटिएका सुरक्षाकर्मीको मृत्यु भएपछि पालिकाले प्राथमिक उपचार केन्द्रको अभाव महसुस गरेको थियो । हामीले २ दिनअघि मात्रै त्यहाँ प्राथमिक उपचार केन्द्रको उद्घाटन समेत गरेका छौं’ उनले भने, ‘त्यहाँ प्राथमिक उपचार हुने हो । पर्यटकहरुको अक्सिजन लेभल देखी लेक लाग्ने सम्मका उपचार हुनेछ ।’

प्राथमिक उपचार केन्द्रमा हाइ अल्टिच्युट (लेक लाग्ने), अक्सिजन मापन, सामान्य चोटपटकको उपचार हुनुका साथै रक्तचापको परीक्षण गर्न सकिनेछ । यसले पदमार्गमा अब प्राथमिक उपचारको समेत व्यवस्था रहेको देखाएको छ ।

‘अन्नपूर्ण वेश क्याम्पबाट प्राथमिक उपचार केन्द्र आउनै २ दिन लाग्छ हिडेर । अब एविसिबाट नजिकै रहेको एमबिसी (माछापुच्छे« वेश क्याम्प) मै प्राथमिक उपचार गराउने व्यवस्था भएको छ । यो आपतकालीन उद्धार तथा प्राथमिक उपचारका लागि बनेको हो’ उनलेभने । अहिले सो प्राथमिक उपचार केन्द्रमा यस अघि छोमरुङमा काम गरिरहेका स्वास्थ्यकर्मी जुमकाजी गुरुङ कार्यरत रहेका छन् ।

आधार शिविरमा केही वर्ष अघिसम्म यस पदमार्गमा पर्ने सिनुवा, बाम्बो, हिमालय, दोभान, देउराली, माछापुच्छ्रे आधार शिविर र अन्नपूर्ण आधार शिविरमा २६ होटेल सञ्चालनमा थिए ।

अन्नपूर्ण क्षेत्र संरक्षण आयोजना (एक्याप) द्वारा २०४३ सालदेखि संरक्षण हुँदै आएको यस क्षेत्रमा एक्यापको निर्धारित मापदण्डअनुसार यसअघि प्रत्येक होटलमा ६ का दरले एक सय ५६ कोठा थिए । तर, पछिल्लो समयमा पर्यटकको बढ्दो आकर्षणलाई दृष्टिगत गर्दै यहाँ होटेल स्तरोन्नतिसँगै होटेल विस्तार गरिएपनि स्वास्थ्य केन्द्रको स्थापना भने हुन सकेको थिएन ।