स्थानीय तहको निर्वाचनमा पोखरा महानगरपालिकाको चुनावी कमान्डर बनि मेयर जिताउन मुख्य मूमिका खेलेका नेकपा एकिकृत समाजवादीका पोलिटिव्युरो सदस्य एवम् गण्डकी प्रदेश कमिटि उपाध्यक्ष श्रीनाथ बराल पुर्व एमालेका पुराना नेता हुन् । पार्टी विभाजन पछि समाजवादी तर्फ लागेका क्रियाशिल नेता बराल आगामी मंसिरमा हुने निर्वाचनका लागि पार्टीको तर्फबाट संघीय सांसदका लागि निर्विकल्प नाम सिफारिस भएको छ । तिनै बरालसँग निर्वाचन र गठबन्धनबारेमा गरिएको छोटो कुराकानी

संघीय सांसदमा निर्विकल्प नाम सिफारिस भएको छ टिकट पाइन्छ त ?

गठबन्धन हुँदा हाम्रो सिट जति पर्छ त्यो भित्र हामी बस्नुपर्छ । पक्कैपनि पार्टीले अटाउनेगरी राख्नेछ भन्ने मैले ठानेको छु ।

गठबन्धनबाट कसरी अघि बढ्दै हुनुहुन्छ ?

सिट निर्धारण गरेपछि मात्रै गठबन्धनमा कसरी जाने भन्ने हो । जुन पार्टीले जति सिट पाउँछ त्यसमा राम्रो, योग्य र सक्षम उम्मेदवार उठाइ चुनावि तालमेल गरेर गठबन्धनको भावना अनुसार नै जाने पक्षमा छौँ । खासगरी सांसद्मा जाने देशको ऐन कानुन, नीति निमार्णमा तहमा जाने भएकाले यसमा जिम्मेवार, धेरै खारिएका र एकदमै बौद्धिक स्तरका साथै जनतासँगपनि सम्बन्ध भएको, विकास निमार्णको काममा घुलमिल हुन सक्ने त्यसता खालको व्यक्तिहरुलाइ हामीले पठाउनपर्ने हुन्छ । हाम्रो निर्वाचन प्रणाली प्रत्यक्ष र समानुपातिक छ । समानुपातिकमा पार्टीबाटै चुनाव लड्छ र प्रत्यक्षमा गठबन्धन गरेर लड्छौँ । हामी त्यहि तयारीका साथ बढिरहेका छौँ र यो राम्रो तयारीका साथ जान्छ भन्ने लागेको छ ।

तपाइको नाम सिफारिस भएको क्षेत्र १ पाउँछ भन्ने विश्वास छ ?

व्यक्तिगत रुपमा भन्दा क्षेत्र नं. १ नै पाउँछौँ । तर समग्रतामा गठबन्धनमा छलफल, समझदारी हुँदा त्यो पर्नपनि सक्छ नपर्नपनि सक्छ । जे होस् कास्कीमा एउटा संघीय र प्रदेशमा २ सांसद हामीले पाउनै पर्छ र हाम्रो वटम लाइन पनि हो । त्यो पाउने स्थितिपनि छ हाम्रो । विगतमा एमाले फुटेर बनेको पार्टी हो । त्यो बेला ३ संघ र ३ प्रदेशको सिट एमालेले जितेको थियो । वाम गठबन्धनकै आधारमा पनि २ सिट माओवादीले जितेको थियो एउटामात्रै कांग्रेसले जितेको थियो । अहिलेको शक्ति सन्तुलनको अवस्था अहिलेको परिस्थिति हेरेर कांग्रेस ठूलो पार्टी छ उसको अलिकति सिट बढी हुन्छ । संघमा एक र प्रदेशको पनि मिलाएर जानुपर्ने हुन्छ । सोही अनुसार जानेछौ ।

कास्कीमा कुन कुन क्षेत्र मागिरहनुभएको छ ?

हाम्रो दृष्टिकोण र विचार हामीले माथि (केन्द्रमा) पठाएका छौँ । त्यो माथिबाट निर्णय भएर आउने कुरा हो । सबै पार्टीको व्यवस्थापनबाट भर पर्छ । हाम्रो चाहान त १ नै हो अब हेरौँ के हुन्छ ।
एमालेमा हुँदापनि पिडित अहिले पनि पिडित नै हुने त होइन् ?
राजनितिमा त्यसतो हुन्छ पुराना कुरा कोट्याएर पनि भएन । म ०६४ सालमा पनि कास्की क्षेत्र नं. २ बाट सिफारिस भएको थिए । ०७४ सालमा पार्टीभित्रको चरम गुटबन्दीका कारण मलाइ रोक्ने अवस्था भयो तरपनि निरन्तर आफ्नो काम गरे । कुनैदिन गुनासो गरिन् । मलाइ पार्टीमा एउटा सिस्टम र विधि हुन्छ भन्ने लाग्छ र त्यहि मापदण्ड हेर्दा अब पक्कै पर्छु भन्ने लाग्छ । मैले टिकट नपाएपनि पार्टीका उम्मेदवारलाइ जिताउन मेरो भूमिका हुनेछ । अब पिडित हुने मैले देखेको छैन् । पक्कैपनि अहिले यो जिम्मेवारी मेरो पार्टीले पाएको कोटामा मैले प्राप्त गर्छुहोला भन्ने ठानेको छु ।

क्षेत्र नं. १ नपाए अन्तबाट उठनु हुन्छ ?

मैले १ नै पाउँछु भन्नेमा ढुक्क छु । पाएन भने त्यसपछिको सल्लाह गर्छु अहिले ढुक्क छु । अन्तबाट उठ्ने भन्ने विषयमा पार्टीको निर्णयमा भरपर्ने कुरा हो । पार्टीले जे निर्णय गर्छ त्यो पुरा गर्न म तयार छु ।

पोखराको मेयर जिताउनुभयो अबको निर्वाचनमा कसरी लाग्नुहुन्छ ?

हाम्रो पार्टी योजनाबद्ध रुपमा लागेको छ । जे जिम्मेवारी पाउँछ त्यही अनुसार हामी लाग्नेछौँ । मेरो अहिलेसम्मको दृष्टिकोण आफुसमेतको उम्मेदवारी भएर सोही अनुसारको तयारी गरिरहेका छौँ । यसमा सिंगो पार्टीपनि लागेको छ । हामीले कति कोटा पाउँछौँ त्यो सहित हामी गठबन्धनका उम्मेदवारलाइ जिताउनेगरी लाग्छौँ ।

टिकट पाए जित्ने आधार केके छन् ?

आधार त हामी जनताका सेवा गरेका छौँ । पार्टीको सेवा गरेका छौँ । हामीसित दृष्टिकोण छ । कसरी प्रदेश सरकार चलाउने त्यसले कस्ता कस्ता काम गर्छन्, केन्द्रिय संसदले कस्ता कस्ता ऐन कानून बनाउनुपर्छ र त्यो क्षेत्रबाट विकास निमार्णका काम कसरी गर्नुपर्छ भन्ने प्रष्ट दृष्टिकोण छ । दोस्रो कुरा विगतमा मौका पाउँदा काम गरिसकेको छु । म जिल्ला विकास समितिको उपसभापति हुँदा सफलता पुर्वक कस्केली जनताको काम गरेको छु । अर्को कुरा मौका नपाउँदा पनि त विकास निमार्णका काममा, विद्यालय, पुर्वाधार, खानेपानी लगायत सबै काममा लागि परेकै छु । राजनितिक हिसाबले म अनुभवि उमेरको हिसाबले पनि म वृद्ध होइन् । म युवा राजनितिज्ञ भएको हिसाबले युवा पुस्ताले मलाइ साथ दिन्छ भन्ने मैले ठान्छु । किनभने पाका नेताहरु जस्तो धेरै दौडधुप गर्न नसक्ने स्थितिमा म छैन् । शारिरीक र मानसिक रुपमा अझै युवा नै छु । पाका पुराना राजनितिज्ञ र युवापंक्ति दुवैको मिश्रण हुँ म । त्यसकारण दुवै पंक्तिले मलाइ रुचाउँछ भन्ने लागेको छ ।

टिकट पाउनुभयो भने तपाइकै पुर्व पार्टी विरुद्ध लड्नुपर्नेछ त्यसलाइ कसरी हेर्नुहुन्छ ?

त्यो पार्टीको कार्यकर्ताले मलाइ धेरै माया गर्नुहुन्छ । त्यो मात्रै होइन सिंगो कास्कीका जनताले माया गर्नुहुन्छ । सबैको भावना जितेर नै विजयश्री हासिल गर्छ । उहाँहरुको सेवामा विना पक्षपात सबैको साझा जनप्रतिनिधि भएर काम गर्छु । जित्नका लागि पनि सबैको सहयोग लिन्छु र जितेपनि सबैलाइ सहयोग गर्छु । मैले तल्लो स्तरसम्म जुन सर्वेक्षण गरेको छु त्यो सर्वेक्षण अनुसार सबैले मलाइ यो पटक चुनाव लड्न सुझाव दिएका छन् । धेरैको माग छ । गठबन्धन त भइहाल्यो पूर्व पार्टीकै साथिहरुले पनि सोही कुरा भनेका छन् । म सबैको संयोजनकारी व्यक्ति हुँ । पूर्व पार्टीमात्र होइन मैले गाउँ र सहर दुवैका मान्छेहरुको समस्या बुझेको छु । मैले घमण्ड गरेको होइन् मेरो जिवन नै राजनितिमा समपर्ण गरेको हुँ । मेरो क्षमतालाइ जनप्रतिनिधि भएर सेवा गर्न चाहान्छु र मलाइ सबैले साथ दिनेछन् ।

अझैपनि गठबन्धनको भागबन्डा मिलेको छैन्, निर्वाचनका ढिला हुँदैन ?

हो । यसले तयारीमा ढिला हुन्छ । तरपनि हामी समानुपातिक निर्वाचन प्रणालीअनुसार सबै क्षेत्रमा लड्छौ । प्रत्यक्षतर्फ गठबन्धनमा सक्रिय भएर मत हाल्न र मतदाता रुझाउन लाग्नुपर्छ । आन्तरिक रुपमा हामी तयारीमा लागिपरेका छौँ । हामीले सबैक्षेत्रबाट नाम सिफारिस गरिसकेका छौ । त्यो हाम्रो प्रारम्भिक तयारी हो । अब सिट बाडँफाड पछि रिसेटल्मेन्ट पनि हुन्छ सक्छ । किनभने हाम्रो पार्टी एकल लड्ने भएपो जहाँ जहाँ हुन्छ त्यहाँ लड्ने । कतिपय अवस्थामा प्रत्यक्षमा नाम सिफारिस भएका साथिहरुपनि समानुपातिकमा जानुपर्ने हुन्छ । कतिपय प्रदेशमा भएका संघमा र संघमा सिफारिस भएका प्रदेशमा उठाउनु पर्ला । कतिपयलाइ एकठाउँबाट अर्को ठाउँमा पनि लानुपर्ला । गठबन्धनमा कति सिट पर्छ त्यो हेरेर पार्टीले रिसेटल्मेन्ट गर्ने भनेको छ ।

प्रदेशमा झर्ने स्थिति बन्ला ?

पार्टीले जहाँ भन्छ त्यहाँ म जान्छु । पार्टीको निर्णय नै मेरा लागि शिरोधारी हुनेछ । मेरो चाहाना केन्द्रिय सांसद हुनेनै हो । संघ छाडेर प्रदेशमा पनि झर्न सक्छु । पार्टीले मापदण्ड हरेर नै बनाउनेछ । नाम सिफारिस हुँदा नै के भनिएको छ भने केन्द्र जसलाइ जहाँ उपयुक्त ठान्छ त्यहि सिफारिस गर्छ सोही अनुसार हामी जाने हो ।

अन्त्यमा आम नागरिकलाइ के सन्देश दिनुचाहानुहुन्छ ?

हामी सबै नागरिकले दुःख गरेर संघीय लोकतान्त्रिक गणतन्त्र ल्याएका छौँ । संविधान निमार्ण भइसकेपछि एकपटक निर्वाचन भएर पाँच वर्ष वितिसकेको छ र दोस्रो निर्वाचन हुँदैछ । हामीले यो व्यवस्थालाइ अगाल्दै आगामी निर्वाचनलाइ शान्तिपूर्ण र भयरहित वातावरणमा सम्पन्न गराउन सहयोग गर्नुपर्छ । अब एउटा गरिब र मध्यमवर्गको व्यक्तिले पनि चुनाव लड्न सक्ने र वर्गिय व्यक्तिहरुपनि देशको नीति निमार्ण गर्ने स्थानमा जान सक्ने व्यवस्था बनाइराख्न हामीसबैले ध्यान दिन पर्छ भन्ने सन्देश दिन चाहान्छु धन्यवाद ।