बागलुङ / गण्डकीका स्वास्थ्य मन्त्री कृष्ण प्रसाद पाठकले बागलुङ नगरपालिका वडा नम्बर ३ हाडेपाखामा बिहीबार साँझ भएको स्कुल बस दुर्घटनामा घाइते भई उपचार गराइरहेका विद्यार्थीलाई भेटेका छन् ।
घाइते भइ धौलागिरी प्रादेशिक अस्पताल बागलुङ, गण्डकी स्वास्थ्य प्रतिष्ठान र मणिपाल अस्पताल पोखरामा उपचार गराईरहेका विद्यार्थीलाई स्वास्थ्य मन्त्री पाठकले अस्पतालमा नै पुगी उनीहरुको स्वास्थ्य अवस्थाको वारेमा जानकारी लिएका हुन् ।
मन्त्री पाठकले घाईतेको अवस्था बुझी उनीहरुको उपचारमा कुनै कमी हुन नदिने गरी उपचारमा लाग्न अस्पतालका चिकित्सक र प्रशासनलाई निर्देशन दिए । घाईते सवै विद्यार्थीको स्वास्थ्य लाभको कामना गर्दै उनले घाईतेका अभिभावकलाई सान्तवना दिए ।
अप्रिय दुर्घटना भएकोले त्यसको शिघ्र उद्धारमा संलग्न सुरक्षाकर्मी, स्थानीय जनप्रतिनिधि, सुरक्षा निकाय, चिकित्सक र स्वास्थ्यकर्मी सवैलाई धन्यवाद दिए । आपत विपतमा प्रदेश सरकार सधै नागरिककै साथमा रहने उल्लेख गर्दै मन्त्री पाठकले घाइतेको उपचारमा कुनै कमी हुन नदिन आफु लागेको बताए ।
उक्त दुर्घटनामा परेर न्यू एभरेष्ट एकेडमी रामरेखाका १ जना विद्यार्थीको मृत्यु भएको छ भने शिक्षिका र ड्राइभरसहित २५ जना घाइते भएका थिए ।
धौलागिरी प्रादेशिक अस्पताल बागलुङका प्रमुख मेडिकल सुपरिटेण्डेन्ट डा.किरण तिवारीले घाइते मध्ये गण्डकी स्वास्थ्य प्रतिष्ठान पोखरामा उपचार गराईरहेका २ जनाको अवस्था गम्भिर रहेको र अन्य सवै घाईते खतरामुक्त रहेको जानकारी दिए । उनले शुक्रवारसाँझसम्म धौलागिरी अस्पतालमा उपचार गराइरहेका केही घाईतेहरु उपचारपछि घर फर्की सकेको जानकारी दिए ।
धौलागिरी अस्पताल विकास समितिका अध्यक्ष श्रीप्रसाद शर्माले अस्पताल प्रशासन, व्यवस्थापन, जिल्लाको सुरक्षा संयन्त्र र जनप्रतिनिधिको सहयोग र समन्वयमा घाइतेको प्रभावकारी उपचार सम्भव भएको जानकारी दिए । उनले सामाजिक सञ्जालमा गरिएका अपूर्ण र भ्रमपूर्ण सूचनाका कारण अस्पतालमा अनावश्यक भिड बढ्दा घाइतेलाई सहजरुपमा उपचार गर्न समस्या भएको बताउदै सर्वसाधरण सचेत र संवेदनशिल नहुँदा अफ्ट्यारो परिस्थिती बनेको भएपनि सबै नियन्त्रण गरेर घाइतेको उपचार गरिएको बताए ।
