काठमाडौं/एएफसी महिला एसियन कप फुटबल प्रतियोगिताको उपाधि जापानले जितेको छ । शनिबार सिड्नीस्थित स्टेडियम अस्ट्रेलियामा भएको फाइनल खेलमा जापानले अस्ट्रेलियालाई १–० ले पराजित गर्दै उपाधि उचालेको हो ।
जापानको जितमा माइका हमानोले पहिलो हाफमै गरेको गोल निर्णायक बन्यो । उनले खेलको १७ औँ मिनेटमा बायाँतर्फबाट आएको पासलाई पछाडि फर्केर नियन्त्रण गर्दै बक्स बाहिरबाट शक्तिशाली प्रहार गर्दै गोल गरिन् ।
यसअघि पनि जापानले २०१४ र २०१८ मा फाइनलमा अस्ट्रेलियालाई हराउँदै उपाधि जितेको थियो । पछिल्ला चार संस्करणमध्ये तीन पटक उपाधि जित्दै जापानले एशियाली महिला फुटबलमा आफ्नो प्रभुत्व कायम राखेको छ ।
यस प्रतियोगिताबाट शीर्ष ६ टोलीले आगामी वर्ष ब्राजिलमा हुने फिफा महिला विश्वकपका लागि छनोट भएका छन् ।
