बागलुङ / भीमापोखरा कल्याण समाज बागलुङको समन्वय र धौलागिरी एफएम ९८ दशमलव ६ मेगाहर्ज बागलुङको आयोजनामा जिल्लाको काँठेखोला- २ भीमापोखराका विद्यार्थीहरुका लागि एकदिने उद्घोषण कला तथा पत्रकारिता तालिम आईतवार सञ्चालन गरिएको छ ।
भीमापोखरास्थित जनकल्याण माध्यमिक विद्यालयका विद्यार्थीहरुलाई एक दिने उद्घोषण कला तथा पत्रकारिता सम्बन्धी प्रशिक्षण कार्यक्रम आयोजना गरिएको समाजका अध्यक्ष डिल्लीराज उपाध्यायले जानकारी दिए । ‘तपाईंको आवाज, तपाईंको पहिचान’ भन्ने मूल नाराका साथ आईतबार बिद्यालयको सभाहलमा तालिम सञ्चालन गरिएको हो ।
विद्यार्थीहरूको व्यक्तित्व विकास र सञ्चार क्षमता अभिवृद्धि गर्ने उद्देश्यले आयोजित यस कार्यक्रममा विद्यार्थीहरूको उत्साहजनक सहभागिता रहेको थियो । तालिममा उद्घोषणको आधारभूत ज्ञान, उद्घोषण कलाको परिचय र यसका आधारभूत नियमहरू, स्वर तथा शुद्ध उच्चारण, स्पष्ट रूपमा बोल्ने र सही उच्चारण गर्ने तरिकाहरू, श्रोतालाई प्रभाव पार्ने कला, मञ्चमा प्रस्तुतीकरण सीप सम्बन्धि प्रशिक्षण गरिएको थियो ।
तालिममा विद्यालयका कक्षा ६ देखि १० सम्मका अगुवा विद्यार्थीहरुको सहभागिता रहेको थियो । तालिमको सहजीकरण नेपाल पत्रकार महासंघ बागलुङका सल्लाहकार, पत्रकार तारानाथ आचार्य र धौलागिरी एफएमका स्टेशन प्रमुख उमाकान्त शर्माले गरेका थिए ।
विद्यार्थीहरूलाई मञ्चको डर हटाउन र आफ्नो सञ्चार क्षमतालाई निखार्न व्यावहारिक अभ्यास गराइयो । तालिमको उद्घाटन गर्दै भीमपोखरा कल्याण समाजका सल्लाहकार चन्द्रमणी उपाध्यायले बिद्यार्थीको क्षमता बिकासका लागि तालिम उपयोगी बन्ने धारणा राखे ।
समाजका अध्यक्ष डिल्लिराज उपाध्यायले उद्घोषण कला जीवनका हरेक कृयाकलापमा काम लाग्ने बताए । उनले भीमपोखरा कल्याण समाजले बिभिन्न संघ संस्थासँग मिलेर सामाजिक क्षेत्रका काम गर्दै आएको जानकारी दिए ।
तालिमको व्यवस्थापन समाजका विशिष्ट सदस्य तथा धौलागिरी एफएमका अध्यक्ष हरिनारायण गौतमले गरेका थिए । उद्घोषण तथा पत्रकारिता तालिमबाट विद्यार्थीहरुलाई प्रस्तुती गर्न र आधारभूत पत्रकारिताको वारेमा ज्ञान लिन सकेको विद्यालयका प्रधानाध्यापक सुशिल गौतमले वताए ।
