बागलुङ/धौलागिरि आयुर्वेद अस्पतालले बागलुङ र पर्वत जिल्लाका ५ हजार ८ सय २८ जना बालबालिकालाई ‘स्वर्णबिन्दु प्रासन’ खुवाएको छ । बालबालिकाको बौद्विक, शारीरिक र वृद्वि विकासका लागि ‘स्वर्णबिन्दु प्राशन’ महत्वपुर्ण मानिन्छ ।
चालु आर्थिक वर्षको असोजदेखि असारसम्म नयाँ–पुराना गरी ५ हजार ८ सय २८ जना बालबालिकालाई ‘स्वर्णबिन्दु प्राशन’ खुवाईएको हो । अस्पतालले गत असोज २९ गते ४ सय ६३ जना बालबालिकालाई ‘स्वर्णबिन्दु प्राशन’ खुवाएर अभियानको शुरुवात गरेको थियो ।
अभियानमा बागलुङका सबै बालबालिकालाई ‘स्वर्णबिन्दु प्राशन’ खुवाउने लक्ष्य भएपनि अधिकांश बागलुङ नगरपालिकाका बालबालिकाले यो औषधि खाएको धौलागिरि आयुर्वेद अस्पतालका निमित्त प्रमुख डा. कमल विक्रम पौडेलले जानकारी दिए ।
यो आर्युवेदिक औषधि भएकोले अन्य असर नभएको र बालबालिकाले मिठो स्वादमा खाने गरेका छन् । ‘‘बागलुङसंगै छिमेकी जिल्ला पर्वतबाट गाडी रिजर्भ गरेर अभिभावकले आफ्ना बालबालिकालाई ‘स्वर्णबिन्दु प्रशान’ खुवाउनुभएको छ’’ डा. पौडेलले भने ।
एक वर्ष काटेका र पाँच वर्ष सम्मका बालबालिकालाई ‘स्वर्णबिन्द प्राशन’ खुवाइन्छ । नेपाली पात्रो अनुसार तृष्य नक्षेत्रको दिन पारेर यो औषधि खुवाउनु पर्ने आर्युवेदिक परम्परा छ । नेपालमा अघिल्लो वर्ष नमूनाको रुपमा केही स्थानमा खुवाउने काम भएपनि बागलुङमा भने असोजबाट औपचारिक रुपमा अभियान शुरु भएको डा. पौडेलले बताए ।
यो अभियानलाई सफल बनाउँदा बालबालिकाको बौद्विक र मानसिक क्षमतामा विकास हुने विश्वास लिइएको छ । अस्पतालले हरेक २८ दिनमा आउने तृष्य नक्षेत्रको दिन ‘स्वर्णबिन्दुर प्रशासन’ औषधी खुवाउने नियमित तालिका सार्वजनिक गरेको छ ।
गत असारदेखि तत्कालिन धौलागिरि आयुर्वेद औषधालयलाई अस्पतालमा स्तरोन्नती गरिएको हो । अस्पताल बनेपछि गण्डकी प्रदेश स्वास्थ्य मन्त्रालयले दरबन्दीको ओएनएम गराइसकेको छ । ओएनएम अनुसार चार जना विशेषज्ञ चिकित्सकसहित २९ जनाको दरबन्दी स्वीकृत भएको छ । ‘‘दरबन्दी अनुसारका चिकित्सक, कविराज लगायतका स्वास्थ्यकर्मी आएपछि अस्पतालले पुर्ण रुपमा काम गर्नेछ’’ डा. पौडेलले भने ।
अस्पतालमा आर्युवेदिक रुपमा तयार पारिने विभिन्न औषधी र चुर्ण निशुल्क वितरण हुने गरेको छ । शल्यक्रियाबाट हुने पाइल्स (अर्स), फिसर (परिकर्तिका) र फिस्टुला (भगन्दर) जस्ता रोग निको पार्ने पद्दती पनि शुरुवात गर्ने अस्पतालको तयारी छ ।
