पोखरा,१० असार–कोपा अमेरिका अन्तर्गत बाहिवार विहान भएको खेलमा ब्राजिलले कोलम्बियालाई हराएको छ । एक गोलले पछि परेको अवस्थामा ब्राजिलले उत्कृष्ट पुरागमन गर्दै कोलम्बिया माथि २–१ को जीत हात पारेको हो ।
रियो दि जेनेरियोस्थित निल्टन सान्तोस रंगशालामा भएको खेलमा लुइस डियाजको गोलबाट कोलम्बियाले १–० को अग्रता लिएको थियो । जुआन कोर्डाडोको क्रसमा अनमार्क रहेका लुइस डियासले ओभरहेड किकमा गोल गर्दा ब्राजिलका गोलरक्षक वेभेर्टनले रोक्ने कुनै मौका नै पाएन ।
अग्रता लिएपनि जोगाउन नसक्दा कोलम्बियाले हार व्यहोर्न बाध्य भएको हो । ब्राजिलका परिवर्तित खेलाडी रोबर्टो फिर्मिनो र क्यासमिराले गोल गर्दै ब्राजिललाई पुनरागमन जीत दिलाएका हुन् ।
खेलको २५औं मिनेटमा नेयमारको क्रस फितलो बन्दा ब्राजिल बराबरीबाट चुक्यो । ३७औं मिनेटमा रिचार्लीसनले अर्काे अवसर पाएपनि सदुपयोग गर्न सकेन ।
४३औं मिनेटमा नेयमारको छोटो कर्नरमा एभर्टन रिवेइरोले दिएको क्रसलाई यारी मिनाले क्लियर गर्दै टोलीको खतरा टारे । दोस्रो हाफमा पनि ब्राजिलले लगातार आक्रमण बुनेपनि गोलको लागि ७८औं मिनेट कुर्नु परेको थियो ।
५६औं मिनेटमा थियागो सिल्भाको पासमा नेयमारको प्रहारलाई डेभिड ओस्पिनाले विफल पारे । ७८औं मिनेटमा फिर्मिनोले गोल गर्दै खेललालई १–१ गोलको बराबरीमा ल्याए ।
नेयमारको क्रस रेफ्रीलाई नस्टर पिटानालाई लाग्दा त्यसमै लुकास पाक्वेटाले दिएको पासमा रेनान लोडीको क्रसमा फिर्मिनोको हेडर गोलरक्षक ओस्पिनाको हातमा लाग्दै गोलमा परिणत भएको थियो ।
उक्त गोलको मुभमा कोलम्वियाले रेफ्रीसँग असहमति जनाएपनि रेफ्रीले आफ्नो निर्णय परिवर्तन गरेनन् । नेयमारको क्रस रेफ्रीलाई नस्टर पिटानालाई लाग्दा खेल नरोकेको भन्दै कोलम्वियाका खेलाडीले असहमति जनाएका थिए
।
फिर्मिनो ४६औं मिनेटमा एभर्टन रिवइरोको स्थानमा मैदान छिरेका थिए । इन्ज्युरी समयको थप गरिएको १०औं मिनेटमा क्यासमिरोले गोल गर्दै ब्राजिललाई २–१ को पूनरागमन जित दिलाए ।
नेयमारको कर्नरमा अनमार्क रहेका क्यासमिरोले हेडरमार्फत सुन्दर गोल गरेका थिए । यो जितसँगै क्वाटरफाइनलमा स्थान बनाइसकेको ब्राजिल ३ खेलबाट ९ अंक जोडेर शीर्षस्थानमा यथावत रहेको छ ।
कोलम्विया ४ अंक जोडेर दोस्रो स्थानमा रहेको छ । बिहिवार विहान नै भएको सोहि समूहको अर्काे खेलमा इक्वेडर र पेरुले २–२ गोलको बराबरी खेल्दै अंक बाँडेका छन् ।
यो बराबरीपछि समूह ‘बी’ मा पेरु ३ खेलबाट ४ अंक जोड्दै तेस्रो स्थानमा रहँदा इक्वेडर ३ खेलबाट २ अंक जोडेर चौथो स्थानमा रहेको छ । समान २ अंक भएपनि भेनेजुएला गोल अन्तरमा पुछारमा छ ।
